काठमाडौं । सत्तारूढ दल नेपाली कांग्रेसले प्रमुख प्रतिपक्ष दल नेकपा (एमाले)का अध्यक्ष केपी शर्मा ओलीले हरियो रङमा आपत्ति जनाएकोप्रति आश्चार्य प्रकट गरेको छ ।

निर्वाचन आयोगले मतपत्रमा हरियो रङ राख्न लागेको विषयमा आपत्ति जनाउँदै ओलीले ‘कांग्रेसको रुखको रङ हरियो हुन्छ भन्दैमा मतपत्रमा हरियो रङ राख्न नहुने’ बताएका थिए ।

कांग्रेसले स्थानीय तह निर्वाचनकेन्द्रित पहिलो चरणको अभियान घोषणाका लागि बुधबार आयोजित पत्रकार सम्मेलनमा ओलीको टिप्पणीको जवाफ फर्काएको हो । ओलीको टिप्पणीले कांग्रेस बहुमतमा आउँदै छ भन्ने संकेत गरेको भन्दै जनताबाट प्राप्त हुने मतबाट नआत्तिन आग्रह गरिएको छ ।

“हरियो रङमा नै आपत्ति हुने हो भने त नेपालको सारा वनजंगल नै फाँड्नुपर्ने हुन्छ,” कांग्रेस प्रवक्ता डा. प्रकाशरण महतले भने, “ओलीको अभिव्यक्तिले कांग्रेस बहुमतमा आउँदैछ भन्ने संकेत गरेको छ ।”

उनले जनताबाट प्राप्त हुने मतका लागि कसैले पनि आत्तिने वा मात्तिने काम गर्न नहुनेमा जोड दिए ।