अफ्रिकी मुलुक बोत्स्वानामा विगत दुई महिनाको अवधिमा सयौं हात्तीहरु मरेको फेला परेपछि त्यसको कारण खोजी भइरहेको छ । दुई महिनाको बीचमा मात्रै ओकाभान्गो डेल्टा क्षेत्रमा ३५० भन्दा बढी मृत हात्तीहरु भेटिएको अधिकारीहरुले बताएका छन् । रहस्यमय तरिकाले मरेका हात्तीहरुको बारेमा गम्भिर अनुसन्धान गरिरहेको त्यहाँको सरकारले जनाएको छ ।

मरेका हात्तीहरुको प्रयोगशालामा परीक्षण भइरहेको र केहि हप्ता भित्रै कारण थाहा हुने अधिकारीहरुको भनाइ छ । अफ्रिका महादेशमै हात्तीहरुकफ तेस्रो ठूलो वासस्थान रहेको बोत्स्वानामा केहि समय यता हात्तीको संख्यामा पनि निरन्तर ओरालो लागिरहेको छ ।

शुरुमा दिनहरुमा चोरी शिकार गर्नेहरुले दाह्राका लागि हात्ती मार्ने गरेको पाइएपनि पछिल्लो समय मृत फेला परेका सबै हात्तीको दाह्रा र शरीरका अन्य बाहिरी भागमा कुनै क्षति पुगेको नदेखिएको बताइएको छ ।

सुख्खा मौसमका कारण मरेको अनुमान गरिएको भएपनि हालैका दिनमा त्यस्तो अवस्था देखिएको छैन् । संरक्षणविद्हरुले मानिसमा देखिएको कोभिड–१९ महामारी उनीहरुले प्रयोग गरेका पानीका स्रोत र खाद्यान्नहरुबाट जनावरमा पनि सरेको हुनसक्ने संभावनालाई पनि नकार्न नसकिने बताएका छन् । तर यो संभावनाको पनि अनुसन्धान भने भएको छैन् ।