काठमाडौं । निर्वाचन आयोगले गरेको अनियमितताको विषय प्रतिनिधिसभाको बैठकमा उठेको छ ।
बिहीबार प्रतिनिधिसभा बैठकको शून्य समयमा बोल्दै सांसद मिना सुब्बाले आयोगले ल्यापटप तथा छपाई मेसिन खरिद गरेर कामै नगरी अलपत्र पारेको विषय उठाउनुभएको हो ।
पछिल्लो समय चौतर्फी आर्थिक अनियमितता भइरहेको बताउँदै सांसद सुब्बाले निर्वाचन आयोगले किनेको करोडौँको सामान प्रयोगविहीन भएको जानकारी गराउनुभयो ।
महालेखा परीक्षकको कार्यालयका अनुसार निर्वाचन आयोगले किनेको ५ सय ८१ वटा ल्यापटप अहिले प्रयोगविहीन अवस्थामा रहेको उहाँले बताउनुभयो ।
सांसद सुब्बाले भन्नुभयो, ‘आयोगले खरिद गरेको ६ सय ५९ वटा ल्यापटपको मूल्य खुलाइएको छैन । मूल्य नखुलाएको मध्ये ५ सय ८१ वटा थन्काइएको छ । आयोगले २०७४ सालमा १० करोड ४० लाख डिजिटल कलर प्रिन्टर किनेको थियो । साथै ११ करोड २८ लाखमा किनेको प्रिन्टरसहित कुल २१ करोड ८३ लाख ४० हजारमा अत्याधुनिक छपाई मेसिन खरिद गरिएको थियो ।
ती सबै हाल प्रयोगविहीन अवस्थामा छन् ।’ सो को छानबिन गर्न सांसद सुब्बाले माग गर्नुभएको छ ।
