काठमाडौं । नेकपा एमालेमा प्रतिनिधि र प्रदेशसभा सदस्यको टिकट वितरणलाई लिएर चरम असन्तुष्टि देखिएको छ । अध्यक्ष केपी शर्मा ओलीले आफू अनुकूल टिकट वितरण गरेको भन्दै केन्द्र र जिल्ला तहका नेता, कार्यकर्ताहरूले पार्टी परित्याग सुरु गरेका छन् ।
नेकपा एमालेका स्थायी कमिटी सदस्य घनश्याम भुसालले एमाले त्यागेको घोषणा गरिसक्नुभएको छ । पार्टीमा नीति र विधिको पुनर्स्थापना हुने कुनै सम्भावना नदेखेको र अध्यक्ष ओलीसँगै रहेर आन्दोलन र आफैंप्रति पनि इमानदार रहन नसक्ने भएपछि एमालेमा नबस्ने निर्णय गरेको भुसालको दाबी छ ।
नेकपा एमालेका नेता भीम रावलले आफूलाई उम्मेदवार हुनबाट रोकिएको भन्दै आइतबारसम्म आगामी बाटोबारे निर्णय लिने बताउनुभएको छ । यसका सम्पूर्ण पक्ष गहन अध्ययन गरिरहेको छु । आइतबारसम्म म व्यवस्थित रूपमा मेरा धारणा र निर्णय सार्वजनिक गर्नेछु,’ रावलले भनेका छन् । यता, एमाले नेतृ अष्टलक्ष्मी शाक्यले पार्टीले दिएको टिकटलाई अस्वीकार गर्दै ओलीलाई विकल्प खोज्न भन्नुभएको छ ।
यसैबीच, एमालेका प्रचार विभाग उपप्रमुख विष्णु रिजालले पार्टीले सबैका गतिविधिलाई सूक्ष्म रुपमा हेरिरहेकोले टिकट पाउने/नपाउने विषय ठुलो नभएको बताउनुभयो । पार्टीलाई सबै मिलेर विजयोन्मुख बनाउनुपर्ने उहाँको धारणा छ ।
एमाले नेता लालबाबु पण्डितका अनुसार सबैको भावना अनुसार टिकट वितरण सम्मानजनक भएको छैन । यद्यपि नेतृत्वले हतारका निर्णय लिनुपर्ने हुँदा सबैले स्वीकार गर्नुको विकल्प छैन ।
एमाले अध्यक्ष केपी शर्मा ओलीले भने टिकट पाउनका निम्ति १० बुँदे पक्षधरले माफी माग्नुपर्ने आफूनिकटहरूसँग बताउँदै आएका थिए । एमालेको १० औं महाधिवेशनमा सर्वसम्मत नेतृत्व चयन गर्ने ओलीको आकांक्षामा रावल र घनश्याम भुसालले चुनौती दिएका थिए ।
