काठमाडौं । नेकपा माओवादी केन्द्रले सबै दलहरूसँग सहमति र समझदारीमा अघि बढ्ने निर्णय गरेको छ।

पार्टी केन्द्रीय कार्यालयमा बसेको पदाधिकारी बैठकपछि महासचिव देव गुरुङ सरकार गठनको विषयमा गठबन्धन दलसँग छलफल गरेर अगाडि बढ्ने प्रष्ट पार्नुभयो ।

भोलि गठबन्धनको बैठक बसेर निर्वाचनको समीक्षा गरेर सरकार गठनको विषयमा धारणा बनाउने उहाँको भनाइ छ।

अहिले आफूहरू गठबन्धनमै रहेको कारणले एमालेसँग मिलेर सरकार बनाउने विषयमा कुनै छलफल नभएको जिकिर गर्नुभयो। अहिले गठबन्धनमै भएकाले मुख्य प्राथमिकता नै त्यही हुने उहाँले दाबी गर्नुभयो ।

अहिलेसम्म गठबन्धनमा कुनै विमति र असहमति नरहेर गठबन्धनबाटै अगाडि बढ्न पहल गर्ने उहाँको भनाइ छ। पार्टीले तुरुन्तै गठबन्धनको विकल्प नखोजेको दाबी गर्नुभयो ।

निर्वाचनको प्रारम्भिक समीक्षा भएको बताउँदै पार्टी स्थायी र केन्द्रीय कमिटीमा छलफल हुने बताउनुभयो ।