काठमाडौं । नेकपा एमालेकी सचिव पद्मा अर्यालले महिलाहरु प्रधानमन्त्री बन्न सक्षम रहेको बताउनुभएको छ । प्रधानमन्त्री मात्रै नभएर अब हरेक ठाउँको नेतृत्व गर्ने दिशातर्फ उन्मुख हुने पूर्वमन्त्री समेत रहनुभएकी अर्यालले विश्वास व्यक्त गर्नुभयो ।

नेपाली रेडियो नेटवर्कको नेपाली बहसमा पत्रकार ऋषि धमलासँग कुरा गर्दै अर्यालले नीति निर्माणको तहमा मात्र नभई नेतृत्वमै पुग्नु महिला आन्दोलनको विशेष उपलब्धि भएको बताउनुभएको छ ।

अर्यालले भन्नुभयो–हामीले संविधानमै समानताको ढोका खोलेका छौं । हरेक ठाउँमा ३३ प्रतिशत महिला सहभागिताको ग्यारेन्टी गरेका छौं । त्यसैले महिला नीति निर्माण तहमा मात्र होइन, नेतृत्व तहमा पनि पुगेका छन् । महिला सभामुख, प्रधानन्यायाधीश, मन्त्री मात्र होइन, दुई–दुई कार्यकालको राष्ट्रपति महिला बनाएका छौं । यो कम उपलब्धि होइन । ’

हिजो दबेर बस्ने महिला हिंसाका घटना आज उजागर हुन थालेको बताउँदै उहाँले यसमा सञ्चार क्षेत्रको महत्वपूर्ण भूमिका रहेकोमा जोड दिनुभयो ।
महिला हिंसा गर्ने अपराधीलाई सजाय दिलाउन सरकारसँगै आम नागरिक पनि सचेत हुनुपर्ने बेला आएको अर्यालको भनाइ छ ।