काठमाडौं । सत्तासाझेदार दल नेपाली कांग्रेसका सभापति शेरबहादुर देउवाले उपनिर्वाचनको प्रारम्भिक परिणामले पार्टीसामु चुनौती खडा भएको देखिएको बताउनुभएको छ ।

आज (सोमबार) बसेको कांग्रेस संसदीय दलको बैठकमा उनले उपनिर्वाचनअन्तर्गत तनहुँ क्षेत्र नम्बर–१ को प्रारम्भिक परिणामले पार्टी थप ‘क्रिटिकल’ अवस्थामा पुगेको बताउनुभएको हो ।

उहाँले पार्टीभित्र एकताको सन्देश दिनुपर्ने र चुनौतीको समीक्षा गर्दै अघि बढ्नुपर्ने बताएको बैठकमा सहभागी एक सांसदले जानकारी दिनुभयो ।

ती सांसदका अनुसार देउवाले आउँदो बजेटमा जनमुखी र कांग्रेस ‘पपुलर’ बन्ने कार्यक्रम समावेश गरिने पनि बताउनुभएको थियो ।

बैठकमा सहभागी अरू सांसदले पनि उपनिर्वाचनको परिणामका विषयमा बोलेका थिए । उनीहरूले मन्त्री मोटाउने र जनता दुब्लाउने प्रवृत्ति हाबी भएकाले पार्टी कमजोर हुँदै गएको धारणा राखेका थिए ।