काठमाडौं । नेपाली कांग्रेसका केन्द्रीय सदस्य अजयबाबु शिवाकोटीले नक्कली भुटानी शरणार्थी प्रकरणमा मुछिएका पूर्वगृहमन्त्री बालकृष्ण खाँडलाई निलम्बन नगर्दा पार्टीलाई दीर्घकालीन प्रभाव पार्ने बताउनुभएको छ ।

जारी केन्द्रीय समिति बैठकमा शरणार्थी प्रकरणलाई बहुमत र अल्पमतको हिसाबले हेरिएको र यसले पार्टीलाई कति दीर्घकालीन प्रभाव पार्न सक्छ भनेर नेताहरु गम्भीर नभएको उहाँको भनाइ छ । नेपाली रेडियो नेटवर्कको नेपाली बहसमा पत्रकार ऋषि धमलासँग कुरा गर्दै नेता शिवाकोटीले निलम्बन भनेको कारबाही नभएकाले निर्दोष देखिए स्वतः फिर्ता भइहाल्ने स्पष्ट पार्नुभएको छ ।

कुनै नेता फौजदारी अभियोग लागेर पक्राउ परेको र जेल गएको अवस्थामा पनि पार्टी, संस्था र नैतिकतालाई पर राखेर हेर्नु कमजोरी रहेको नेता शिवाकोटीको भनाइ छ ।

शरणार्थी प्रकरणमा पार्टीको साझा धारणा बन्न नसकेको र धेरै केन्द्रीय सदस्यले व्यक्तिको नाम नलिईकन बचाउ गरिरहेको उहाँको दाबी छ ।

यस्तै अर्को प्रसंगमा नेता शिवाकोटीले केन्द्रीय समिति बैठकमा गगन थापा समूह कमजोर हुनु स्वाभाविक भएको पनि बताउनुभयो ।

आम जनताले कांग्रेस संसदीय दलको नेता परिवर्तन गर्नुपर्छ भन्ने लागे पनि पार्टी केन्द्रीय समितिका सदस्यहरुलाई नलागेको हुन सक्ने उहाँको भनाइ छ ।