काठमाडौं । सप्तरीको छिन्नमस्ता गाउँपालिकामा पालीका पार्टीको अभ्यास गरिएको छ । पालिकामा निर्वाचित सबै पार्टीका जनप्रतिनिधिहरुले पालिका पार्टी गठन गरी पार्टी केन्द्रीतभन्दा पालिका केन्द्रीत भूमिका खेल्ने अठोट गरेका हुन् ।

पालिका पार्टी गठन गरेपछि पालीकाका सबै निर्णय सर्वसम्मत गरिएको सबैको प्राथमिकता पालिका नै भएको गाउँपालिकाका अध्यक्ष विद्यानन्द चौधरीले जानकारी दिनुभयो । गाउँपालिकामा अध्यक्ष चौधरी एक्लै लोकतान्त्रीक समाजवादी पार्टीबाट निर्वाचित हुनुभएको हो भने अन्य पदाधिकारीहरु अन्य पार्टीबाट निर्वाचित भएका छन् ।

उहाँले फरक फरक पार्टीबाट निर्वाचित भएपनि पालिकाको काममा सबैको पर्याप्त सहयोग र समर्थन पाएको उल्लेख गर्नुभयो । आफू उमेरले अहिले २६ बर्षको मात्रै भएपनि काममा अविश्वास र असहयोग कसैले नगरको बताउनु भयो ।

नेपाली रेडियो नेटवर्कको पालिका वहसमा पत्रकार ऋषि धमलासँगको कुराकानीका क्रममा उहाँले गाउँपालिकाका जनतालाई प्रभावकारी सेवा प्रवाहका लागि वार्डको सेवा टोल टोलमा लैजान सुरु गरिएको जानकारी दिनुभयो ।

उहाँले पछाडि पारिएको समुदायका व्यक्तिहरु वडा तथा पालिकाको कार्यालयमा आएर सेवा लिँनेक्रममा बोल्न वा काम गर्न हिचकिच्याउने र आफ्नै टोल टोलमा सेवा दिँदा आत्मविश्वास धेरै देखिने गरेकाले टोल टोलबाटै सेवा दिन थालिएको अनुभव सुनाउनु भयो ।

टोल टोलबाट सेवा दिन जाँदा, नागरिकताका लागि आवश्यक सहयोगदेखि भत्ता कार्डको नविकरण, जन्मदर्ता, विवाहदर्ता लगायतका दर्जनौ सेवा दिने गरिएको उहाँको भनाई छ ।

उहाँले गाउँपालिकामा भौतिक निर्माणदेखि जनसेवासम्मका कामलाई कानुन अनुसार र प्रभावकारी बनाउनेगरी काम गरिरहेको उल्लेख गर्नुभयो