काठमाडौं । नेकपा (माओवादी केन्द्र) का सचिव लीलामणि पोखरेलले प्रधानमन्त्री पुष्पकमल दाहाल प्रचण्डको चीन भ्रमणका बेला चीनको नयाँ नक्सामा नेपालको चुच्चे नक्सा नसमेटिएको सम्बन्धमा कुरा उठाउनुपर्ने बताउनुभएको छ ।

नेपालको नक्सालाई चुच्चे नक्सा भन्नु उपयुक्त नभएको बताउँदै उहाँले यो नेपालको पूर्ण नक्सा रहेको दाबी समेत गर्नुभयो । नेपाली रेडियो नेटवर्कको नेपाली बहसमा पत्रकार ऋषि धमलासँग कुरा गर्दै नेता पोखरेलले यो सुगौली सन्धिले तय गरेको नक्सा रहेकाले कुनै मुलुकले चिनेन भन्ने कुरा उठाउनुपर्नेमा जोड दिनुभयो ।

कुनै पनि मुलुकको हस्तक्षेप र अपमान स्वीकार्य नहुँने बताउँदै नेता पोखरेलले भारत र चीनका प्रधानमन्त्रीबीचको संयुक्त वक्तव्यपछि आफ्नो पार्टीको विदेश विभागले सात वर्ष अगाडि नै चिनियाँ राजदूतलाई ज्ञापनपत्र दिएको स्मरण पनि गराउनुभयो ।

यस्तै नेता पोखरेलले एमसीसी कार्यान्वयनमा जानु दूरगामी दुर्भाग्य हुने पनि तर्क गर्नुभएको छ । प्रधानमन्त्री प्रचण्डले एमसीसीको विरोध गर्नु वा नगर्नु नभनेको बताउँदै उहाँले एमसीसी नेपालको अराष्ट्रिय हित अनुकूल नभएको स्पष्ट पार्नुभयो ।

साथै नेता पोखरेलले महँगी नियन्त्रण र जनताका निम्ति सरकारले राहत प्याकेज ल्याउनुपर्ने बताउनुभएको छ ।