काठमाडौं । नेपाली कांग्रेसका प्रचार विभाग प्रमुख मीन विश्वकर्माले सहमहामन्त्री महेन्द्र यादवमाथिको आक्रमण सरकारले गर्ने कामकारवाहीमा गृह प्रशासनले आफ्ना संयन्त्रहरुलाई चुस्तदुरुस्त ढंगले शान्तीसुरक्षाका लागि परिचालन गर्न नसकेको देखाएको बताउनुभएको छ ।

नेपाली रेडियो नेटवर्कको नेपाली बसहमा पत्रकार ऋषि धमलासँग कुरा गर्दै पूर्व मन्त्रीसमेत रहनुभएको विश्वकर्माले महेन्द्र पुलिस क्लव अगाडि काठमाडौंको केन्द्रबिन्दु मानिने भृकुटीमण्डपमा दिनदहाडै भएको यो घटना अत्यन्तै निन्दनीय र भत्सर्ना योग्य रहेको बताउनुभयो ।

अहिलेको राजनीतिक परिवेशमा जसरी उत्ताउलो, उत्तेजनायुक्त र सद्भाव विथोल्ने किसिमका अभिव्यक्ति जताततै जिम्मेवार ठाउँबाट आइरहेका छन् त्यसकै प्रतिविम्वका रुपमा पनि हिजो त्यस्तो घटना देखिएको तर्क गर्नुभयो । सहमहामन्त्री यादवमाथि हिजो दिउँसै खुकुरी प्रहार भएको थियो ।

रिपोर्टर्स क्लबमा आयोजित कार्यक्रममा भाग लिएर बाहिरिने क्रममा यादवमाथि खुकुरी आक्रमण भएको हो । यादवमाथि आक्रमण गर्ने नुवाकोटाको विदुर नगरपालिका–७ बस्ने ४७ वर्षीय श्याम सापकोटालाई आक्रमणमा प्रयोग भएको खुकुरीसहित प्रहरीले नियन्त्रणमा लिएर अनुसन्धान गरिरहेको छ भने धारिलो हतियारबाट यादवको टाउकाको पछाडिको भागमामा गहिरो चोट लागेको छ । उहाँको ट्रमा सेन्टरमा उपचार भइरहेको छ ।

यो आक्रमणको कारण खुल्न सकेको छैन । यस घटनाका बारेमा अनुसन्धान शुरु गरेको जिल्ला प्रहरी परिसर काठमाडौंले जनाएको छ ।

यस्तै कांग्रेसले पार्टीका सहमहामन्त्री यादवमाथि भएको साङ्घातिक हमलालाई गम्भीरतापूर्वक लिई घटनाको निन्दा गरेको छ ।

घटनाको कांग्रेसले घोर निन्दा र भर्त्सना गरेको पार्टी कार्यालयका मुख्यसचिव कृष्णप्रसाद पौडेलले हिजो नै जारी गर्नुभएको विज्ञप्तिमा उल्लेख छ ।