काठमाडौं । सरकारी वार्ता टोलीले समय नदिँदा सरकार र सत्याग्रही डा. गोविन्द केसी पक्षबीचको वार्तामा ढिलाइ भएको छ ।

आज बिहानैबाट वार्ता थाल्ने भने पनि सरकारी टोलीले समय नदिएको केसी पक्षको भनाइ छ । २६ दिनदेखि अनशनरत केसीको स्वास्थ्य झन् जटिल बन्दै गएको छ ।

बिहीबार प्रधानमन्त्री केपी शर्मा ओलीसँग छलफल गर्ने भन्दै सरकारी वार्ता टोलीले समय मागेको थियो । पछि आन्तरिक गृहकार्यका लागि भनेर वार्ता स्थगित गरिएको थियो ।

बिहीबार दुई पक्षबीच करिब १० घण्टा केसीका मागबारे छलफल भएको थियो । दुवै वार्ता टोलीले वार्ता सकारात्मक रहेको र निष्कर्षउन्मुख रहेको प्रतिक्रिया दिएका थिए ।