काठमाडौं । नेपाली कांग्रेसका प्रमुख सचेतक रमेश लेखकले संसदलाई दलहरुले राजनीतिक प्रचारप्रसारको थलोको रुपमा उपयोग गरिरहेको आरोप लगाउनुभएको छ ।

नेपाली रेडियो नेटवर्कको नेपाली बहसमा पत्रकार ऋषि धमलासंग कुरा गर्दै प्रमुख सचेतक लेखकले जनताका समस्या र मुद्दाहरु उठाउने थलो संसदलाई आ–आफ्नो दल राम्रो, आफूहरुले मात्रै राम्रो काम गरेकोलगायतका कुरामा मात्रै प्रचारबाजी गर्ने थलो बनाइरहेको आरोप लगाउनुभयो ।
यस्तै प्रमुख सचेतक लेखकले संसद काम नलाग्ने ठाउँ हो भन्ने सन्देश गए व्यवस्थाको लागि घातक हुने समेत बताउनुभएको छ ।

प्रमुख सचेतक लेखकले सांसदहरुको गतिविधि व्यवस्थाकाविरुद्धमा वातावरण बन्नेतिर निर्देशित भएका छन् कि भन्ने विषयमा सोच्न जरुरी रहेको बताउँदै धेरै विधेयकहरु बनाउनुपर्ने अवस्था रहेको भन्दै संसदभित्र अवरोध गर्नु नहुने पनि बताउनुभएको छ ।

हिजो प्रतिपक्ष दल लगायतका प्रतिपक्ष दलहरुका कारण संसद बैठक अवरुद्ध भएको थियो । बैठकमा आकस्मिक समयमा सांसदहरुले आ–आफ्नो कुरा राख्दै गर्दा आपत्ति जनाउँदै प्रतिपक्ष दलहरुले प्रतिनिधि सभा बैठक अवरोध गरेका हुन् ।

प्रमुख सचेतक लेखकले संसदभित्र आलोचना स्वस्थ ढंगले गर्नुपर्ने र धैर्यता, संयमित भएर सांसदहरुले आ–आफ्ना कुराहरु राख्नुपर्ने जोडसमेत दिनुभएको छ ।

यस्तै प्रतिपक्षले खाली सरकारका विरुद्धमा बोलेर आफूमात्रै राम्रो छु भनेर भन्नु गलत रहेको पनि उहाँको भनाइ छ ।

विवादित मन्त्रीहरुकोबारेमा आफ्नो पार्टीले प्रतिपक्षले भन्दा पनि खरोरुपमा सरकार, प्रधानमन्त्री र मन्त्रीहरुलाई प्रश्न र खबरदारी गरिरहेको समेत लेखकले दाबी गर्नुभएको छ ।