काठमाडौं । राष्ट्रिय प्रजातन्त्र पार्टीका महामन्त्री डा. धवलशमशेर जवराले सहकारी पीडितको पक्षमा आफूहरुले सदनदेखि सडकसम्म निरन्तर आवाज उठाइरहेको बताउनुभएको छ ।

नेपाली रेडियो नेटवर्कको नेपाली बहसमा पत्रकार ऋषि धमलासँग कुरा गर्दै जवराले सहकारी ठगी प्रकरणको सत्यतथ्य र निष्पक्ष अनुसन्धान गरेर दोषीलाई कारवाही र पीडितलाई न्याय दिन सरकार गम्भिररुपमा लाग्नुपर्ने माग गर्नुभयो ।

यो प्रकरणमा मुछिएका उपप्रधान तथा गृहमन्त्री रवि लामिछानेले राजीनामा दिएर या पदबाट बाहिर बसेर छानविन हुँदासम्म प्रभाव नपार्नेगरी सहयोग गर्नुपर्ने नेता जवराको भनाइ रहेको छ ।

प्रमूखप्रतिपक्ष दल नेपाली कांग्रेसले रास्वपाका सभापतिसमेत रहनुभएका गृहमन्त्री लामिछानेको राजीनामा निरन्तर मागिरहेको छ भने संसदमा अवरोधसमेत गरेको छ । राप्रपाको पनि यहि माग र आवाज रहेको नेता जवराले स्पष्ट पार्नुभयो । गृहमन्त्रीले स्वयम्ले नै राजीनामा दिएर छानविनको मार्गप्रशस्त गरिदिनुपर्नेमा चौतर्फि आलोचना र दवाव हुँदासम्म अटेर गरेर बसिरहनु उचित नभएको उहाँको भनाइ छ ।

सबै सांसद र मन्त्रीहरु जो आरोपित छन् जो माथि अख्तियार अथवा सिआइबीको छानविन भइरहेको छ त्यस्ता व्यक्तिहरु निष्पक्ष छानविनको लागि मार्गप्रशस्त गरिदिनुपर्ने र सरकारले पनि बचाउ तर्फ नभई कारवाही गर्नतर्फ लाग्नुपर्ने उहाँको तर्क रहेको छ ।

यस्तै, देशव्यापीरुपमा आन्दोलनको तयारीमा रहेको राप्रपाले २७ गतेदेखि काठमाडौंमा विशाल जनसभा गरेर आन्दोलनलाई अगाडि बढाउने उहाँले बताउनुभयो ।