काठमाडौं । प्रमुख प्रतिपक्षी दल नेपाली कांग्रेसको विरोधका बीच प्रधानमन्त्री पुष्पकमल दाहाल प्रचण्डले चौथो पटक विश्वासको मत पाउनुभएको छ । तेस्रो कार्यकालमै प्रधानमन्त्री प्रचण्डले प्रतिनिधिसभाबाट चौथो पटक विश्वासको मत लिनुभएको हो । प्रधानमन्त्री प्रचण्डको पक्षमा १५७ मत प्राप्त गर्नुभयो भने मत दिन्न भन्नेमा १ मत परेको थियो । सोमबारको बैठकमा १५८ सांसद उपस्थित रहेका थिए । प्रधानमन्त्री दाहालले संविधानको धारा १०० को उपधारा (२) अनुसार विश्वासको मत लिनुभएको हो । उहाँ विश्वासको मत लिने क्रममा कांग्रेससँग आक्रामक बन्नुभयो । कांग्रेसले यसको मूल्य चुकाउनुपर्ने प्रचण्डको धारणा थियो ।
नेपाली कांग्रेसले संसद् बैठक शुरु हुनासाथ विरोध जनाएको थियो । चर्को नाराबाजीका बीच सभामुख देवराज घिमिरेले कारबाही अघि बढाएपछि प्रधानमन्त्रीले विश्वासको मत लिनुभएको हो । कांग्रेस प्रमुख सचेतक रमेश लेखकले सरकारले संसदीय मूल्य मान्यता, परम्परालाई कमजोर तुल्याएर सहकारी ठगलाई जोगाउने प्रयत्न गरिरहेको आरोप लगाउनुभयो ।
नेकपा एमालेले संसदीय छानबिन समिति बनाउने विषयमा सत्तापक्ष र प्रतिपक्षबीच सहमति जुटेपनि कांग्रेसले संसद् बन्धक बनाउन खोजेको आरोप लगाएको छ । कानूनमन्त्री समेत रहनुभएका एमाले सांसद पदम गिरिले कांग्रेसले सहमति र व्यवहार फरकफरक देखाएको बताउनुभयो । संसद्लाई होल्ड गरेर धेरै दिन बस्न नसकिने उहाँको धारणा थियो ।
प्रतिपक्षीको बेञ्चमा रहेका सांसदहरू सरकारको काम कारबाहीबाट रुष्ट बनेका छन् । राष्ट्रिय जनमोर्चाका अध्यक्ष एवं सांसद चित्रबहादुर केशीले प्रचण्डले १७ महिनामा चारपटक विश्वासको मत लिएर जग हँसाएको बताउनुभयो । पटकपटक विश्वासको मत लिनुपर्ने बाध्यता स्वयं प्रचण्डले सिर्जना गरेको उहाँको आरोप छ ।
संसद्को आजको दृश्य हेर्दा प्रमुख प्रतिपक्षी दल नेपाली कांग्रेसले समेत सुरक्षित अवतरण चाहेको हो की भन्ने शंका उब्जिएको छ । सरकार भने पेलेरै अगाडि बढ्ने रणनीतिमा रहेको छ । कांग्रेसको अवरोध कायमै रहे अध्यादेश ल्याएर बजेट पारित गर्ने तयारीमा सत्तापक्ष रहेको बुझ्न सकिन्छ ।
