काठमाडौं । नेपाली कांग्रेसका प्रवक्ता डा. प्रकाशशरण महतले माओवादी केन्द्र अहिले सत्ताबाट बाहिरिनुपरेको अस्वभाविक अवस्थामा रहेको बताउनुभएको छ ।

लामो समय सत्तामा रहेको माओवादीले अहिले बाहिरिनु पर्दा अत्तालिएर संसद अवरोध र विभिन्न खाले झुटा टिप्पणी गर्न थालेको उहाँको आरोप रहेको छ ।

नेपाली रेडियो नेटवर्कको नेपाली बहसमा पत्रकार ऋषि धमलासँग कुरा गर्दै पुर्वमन्त्रीसमेत रहनुभएका प्रवक्ता महतले हिंसा शब्दलाई लिएर संसद अवरोध गर्नुपर्ने कारण नै नभएको स्पष्ट पार्नुभयो ।

प्रतिनिधि सभा बैठकमा एमाले सांसद योगेश भट्टराईले भदौ १२ गते माओवादी सशस्त्र संघर्षलाई ‘हिंसा’ भनेपछि माओवादी सांसदहरुले त्यसमा विरोध जनाउँदै आएका छन् । यही विवादका कारण केहिदिन यता संसदमा अवरोध भइरहेको छ भने हिजोको बैठक बस्न सकेको थिएन ।

यस्तै अर्को प्रसंगमा उहाँले वर्तमान सरकारले देश र जनताको लागि समर्पित भएर काम गर्नुपर्ने बताउनुभएको छ ।
जनताले चाहेको जस्तो नभएको भए पनि विस्तारै राम्रा कामहरु हुनेक्रममा रहेकाले अहिलेको सरकारले निराश नबनाउने पनि उहाँको दाबी रहेको छ ।

सत्तामा हुँदा केहि नगर्ने प्रतिपक्षमा हुँदा गरेन भनेर विरोध गर्ने माओवादी र रास्वपाले जनतामा भ्रम छर्न खोजेको पनि नेता महतको आरोप रहेको छ ।