एजेन्सी । जम्मू–काश्मिरस्थित भारत–पाकिस्तान सीमामा शुक्रबार भएको झडपमा १६ जनाको मृत्यु भएको छ । जसमा तीनजना भारतीय सैनिक र एकजना पाकिस्तानी सैनिक पनि रहेका छन् । दुवै पक्षका गरी कम्तीमा ३६ जना घाइते भएको अन्तर्राष्ट्रिय समाचार संस्थाले जनाएका छन् ।

दुवै पक्षले एक अर्कालाई युद्धविराम सम्झौता उल्लंघन गरेको आरोप लगाएका छन् । पाकिस्तानी अधिकारीहरुले शुक्रबार राति भारतले रकेट र मोर्टार सेल प्रहार गर्दै द्वन्द्वको सुरुवात गरेको आरोप लगाएको छ ।

पाकिस्तानी अधिकारीका अनुसार एक पाकिस्तानी सैनिक र पाँच सर्वसाधारणको भारतीय आक्रमणमा परी मृत्यु भएको छ ।

त्यस्तै, पाकिस्तानी सञ्चारमाध्यम डनका अनुसार आक्रमणमा परी ३० जना सर्वसाधारण र पाँचजना सैनिक घाइते भएका छन् । भारतीय अधिकारीका अनुसार पाकिस्तानले गरेको आक्रमणमा परी ६ सर्वसाधारण, तीन सैनिक र एकजना बिबिएसएफ जवानको मृत्यु भएको छ ।

भारतीय सेनाले पाकिस्तानले युद्धविराम सम्झौता उल्लंघन गर्दै पहिले आक्रमण गरेको आरोप लगाएको छ । जवाफी कारबाहीमा पाकिस्तानतर्फको भौतिक संरचना ध्वस्त बनाएको भारतीय सेनाले दाबी गरेको छ ।

पाकिस्तानी अधिकारीले भने पाकिस्तान प्रशासित जम्मू–कश्मीरको निलम र लिपा उपत्यकामा सर्वसाधारणलाई लक्षित गरी भारतले आक्रमण गरेको आरोप लगाएका छन् ।