काठमाडौं । प्रमुखप्रतिपक्ष दल नेकपा माओवादी केन्द्रका उपमहासचिव जनार्दन शर्माले पार्टीको मुख्य उदेश्य नै जनताबिच जानु भएको बताउनुभएको छ ।

जनतासँग प्रत्यक्ष भेट गर्ने, उनिहरुको समस्याहरुको समाधानमा पहल गर्नु नै माओवादीको पहिलो प्राथमिकता भएको नेता शर्माको भनाइ छ ।

नेपाली रेडियो नेटवर्कको नेपाली बहसमा पत्रकार ऋषि धमलासँग कुरा गर्दै पूर्वअर्थमन्त्रीसमेत रहनुभएका शर्माले पार्टीका सबै नेताहरुको बानी, आचरणहरु सुध्रिनुपर्नेमा जोड दिदै सबैको सम्पत्तिको छानविन गरेर पार्टीलाई रुपान्तरण गर्ने स्पष्ट पार्नुभयो ।

पार्टीमा देखिएका केहि कमिकमजोरीहरुलाई सुधार गर्दै अब सशक्त बनेर अगाडि बढ्ने र आगामी निर्वाचनमा जनताको मन जितेर देखाउने समेत उहाँको दाबी छ ।

गत मंसिरमा सम्पन्न उपनर्विाचन देखि नै माओवादी पार्टीमा जनताको विश्वास फर्किएको झल्को देखिएकाले अब पूर्णरुपमा जनता केन्द्रित भएर अगाडि बढ्ने नेता शर्माको भनाइ छ ।

विगतमा आफूहरु सुविधाभोगी भएर पहिलो पार्टी बनाएका जनतालाई छाडेको कारण नै तेस्रो बन्न पुगेको स्विकार गर्दै नेता शर्माले अब जनताका भावना अनुसार नै आफूहरु चल्ने प्रतिवद्धता व्यक्त गर्नुभयो ।

माओवादीले सुरुको ६ महिना अभियानमा जाने र त्यसपछि अर्को ६ महिनाको तयारी गरेर नयाँ विचार संष्लेषणका लागि महाधिवेशनमा जाने निर्णय गरेको पनि उहाँले बताउनुभयो ।

माघ महिनाभरि अभियानको तयारी गरेर फागुन १ गते जनयुद्ध दिसव मनाएर हुलाकी र पूर्वपश्चिम राजमार्गमा जनतासँग माओवादी अभियान सञ्चालन गर्ने निर्णय भएको छ ।

यस्तै नेता शर्माले एमाले र कांग्रेसको समिकरणमा बनेको वर्तमान सरकार पूरा असफल देखिएको पनि आरोप लगाउनुभएको छ ।