काठमाडौं । जसपा नेपालका वरिष्ठ उपाध्यक्ष राजकिशोर यादवले नेपालको राजनीतिमा समस्या विकराल रुपमा देखिएको बताउनुभएको ।

सरकार जसरी सन्चालन हुनुपर्ने हो त्यसरी भइरहेको छैन भन्ने चौतर्फि गुनासो बढिरहेको बताउँदै राजनीति र अर्थतन्त्रमा समस्या बढ्दै गइरहेको दाबी गर्नुभयो ।

नेपाली रेडियो नेटवर्कको नेपाली बहसमा पत्रकार ऋषि धमलासँगकुरा गर्दै नेता यादवले नेताहरु लिडर नभएर डिलर भएको आरोप लगाउनुभयो ।

जनताको बलमा बनेका नेताहरुले जनतालाई नै बिर्सिएर आफू र आफ्नाको लागि मात्रै गर्ने प्रवृतीले अहिलेको अवस्था उत्पन्न भएको तर्क गर्नुभयो । नेताहरु अब कि सुध्रिनुपर्छ कि भने सकिनुपर्नेमा जोड दिदै उहाँले जवसम्म देश र जनताको हितमा काम हुदैन तवसम्म नेताहरु कुनै पनि हालतमा सफल बन्नै नसक्ने टिप्पणी गर्नुभयो ।

सरकारमा हुँदा केहि नगर्ने प्रतिपक्षमा जादासाथ विरोधमा उत्रिने पूरानै शैली अहिले पनि दोहोरिरहेकोले जनता अहिले आक्रोशित बनेको नेता यादवको भनाइ छ ।

जनताका आक्रोशलाई समयमै सम्बोधन गर्ने गरी अब नेताहरु सचेत भएर अगाडि बढ्न सुझाव दिँदै उहाँले यदि यस्तो नभए भोलिको दिनमा अवस्था असामान्य हुने चेतावनी दिनुभयो