काठमाडौं । निर्वाचन परिणाम आफ्नो पोल्टामा पारेको राष्ट्रिय स्वतन्त्र पार्टी रास्वपा सरकार गठनका गृहकार्यमा जुटेको छ । चुनावमा बालेन शाहलाई भावी प्रधानमन्त्री घोषणा गरेको रास्वपाले सबै भन्दा पहिले संसदीय दलको नेता चयन गर्ने भएको छ ।

बालेनलाई दलको नेता बनाएर सरकारमा सहभागी हुने अरु मन्त्रीहरुको नाम छनोट गर्ने तयारी रास्वपाले गरेको छ । सरकार गठन र समानुपातिबाट सांसद बन्नेहरुको नाम छनोट गर्न रास्वपाले छलफल जारी रहेको जनाएको छ ।

फागुन २१ गते सम्पन्न प्रतिनिधिसभा चुनावी परिणामले झण्डै दुई तिहाई बहुमत ल्याउन लागेको रास्वपामा समानुपातिक सांसद बन्ने र मन्त्री नियुक्ति हुने दौड सुरु भएको छ । समानुपातिक सांसदसँगै मन्त्री बन्ने आकांक्षीहरुले सभापति रवि लामिछाने र बरिष्ट नेता बालेनको लोलोपोतो गर्न थालेका छन् ।

तर, रवि र बालेन केही बोल्नु भएको छैन । प्रत्यक्षमा निर्वाचित सांसदहरु भने रवि र बालेनका पक्षमा खुलेर बोल्न थालेका छन् । काठमाडौं निर्वाचन क्षेत्र नं ३ बाट निर्वाचित बालेन गुटका रास्वपा सांसद राजुनाथ पाण्डेले प्रधानमन्त्रीमा दायाँबायाँ गरेर देखाइदिने धम्की नै दिनु भएको छ । उहाँले रास्वपाका पदाधिकारीलाई गैरजिम्मेवार कुरा गर्ने छुट नभएको बताउनु भयो ।

रास्वापामा प्रधानमन्त्री र मन्त्री को बन्ने भन्ने रस्साकस्सी सुरु भएको पाण्डेको अभिव्यक्तिले नै प्रष्ट रुपमा देखाएको छ । तर, रास्वपाले प्रधानमन्त्रीमा बालेन शाहलाई अगाडि सार्ने कुरामा नेताहरुबीच घम्साघम्सी चलेपनि पार्टीकी सहप्रवक्ता प्रतिभा रावलले बालेन प्रधानमन्त्री बन्ने कुरामा कुनै विवाद नरहेको दाबी गर्नुभयो ।

बेथिती, विसंगती, कुशासन अन्त्य गर्ने नारा दिएर जनमत पाएको रास्वपा यतिबेला फुरुङ भएर हौसिएको छ । लगाम बिनाको घोडा जस्तै रास्वपका नेताहरु भने आफू अनुकुल अभिव्यक्ति दिइरहेका छन् । रास्वपाका नेताहरु अब जनमत भुलेर आफूआफैंमा भिड्ने संकेत दिइरहेका छन् । तर, रास्वपालाई आफूआफैंमा भिडेर जनमतको अवमुल्यन गर्ने छुट छैन । हिजो पुराना दलहरुको कमजोरीलाई हाताहाती गरेको रास्वपाले अब जनतासमक्ष गरेको बाचा पुरा गर्नुपर्नेछ । अब अरुलाई दोष दिएर उम्कने छुट नभएको रास्वपाकी सहप्रवक्ता प्रतिभा रावलले बताउनु भयो ।

रास्वपाले सरकार सम्हालेको तीन महिनाभित्र राष्ट्रिय सहमति कायम गर्ने हेतुले संविधान संशोधनका प्रस्तावहरुबारे बहसपत्र तयार गर्ने रास्वपाले बाचापत्रमा उल्लेख गरेको छ । रास्वपाका तर्फबाट प्रारम्भिक छलफलका लागि पेश हुने विषयमा प्रत्यक्ष निर्वाचित कार्यकारी, पूर्ण समानुपाति संसद्, सांसद मन्त्री नुहने व्यवस्था, गैरदलिय स्थानीय सरकार र सुधारिएको प्रादेशिक स्वरुव हुने भनेको छ । जुन बुँदा मतदाताले कण्ठै गरेर बसेका छन् ।

तर, रास्वपाले चुनावमा गरेको बाचापत्रको १० नम्बर बुँदा तत्काल कार्यान्वयन गर्न नसकिने जवाफ दिएको छ । जनता समक्ष गरेको बाचापत्र कार्यान्वयन गर्नबाट रास्वपा स्वंय पञ्छिने जुक्तिमा लागेको देखिएको छ । बाचापत्रको बुँदा कार्यान्वयन गर्न संवैधानिक अड्चन भनेको छ । सरकार गठन हुनु अघि नै रास्वपाले संसद बाहिरबाट मन्त्री बनाउने कुरा भविष्यको हो भनेको छ । रास्वपाकी सहप्रवक्ता प्रतिभा रावलले सांसद बाहिरबाट मन्त्री बनाउने कुरा तत्काल कार्यान्वयन नहुने जवाफ दिनु भएको छ ।

सरकार गठनको तयारीमा रहेको रास्वपामा मात्रै होइन, नानीदेखि लागेको बानी भने जस्तै चुनावी परिणामले थला परेका कांग्रेस र एमाले पनि घरझगडामा लागेका छन् । कांग्रेसमा गगन थापालाई र एमालेमा केपी ओलीको उछित्तो काट्न सुरु भइसकेको छ । कांग्रेस नेता कृष्ण सिटौलाले विशेष महाधिवेशन उचित नभएको प्रतिक्रिया दिनु भएको छ ।

चुनाव अगाडि दिएका ओलीका अभिव्यक्तिलाई दिएर खिसिट्युरी गर्न एमालेका नेता कार्यकर्ता नै लागेका छन् । देशभरीमा सर्वाधिक मत ल्याएर विजयी हुने अभिव्यक्ति दिनु भएका ओलीको सिंगौरी खेल्ने सिंग भाँचिएको छ । ओलीले चुनावमा जाँदा सबैभन्दा बढी मत ल्याएर विजयी हुने आफू नै रहेको बताउनु भएको थियो ।

एमालेकै अर्का उम्मेदवार सुर्य थापाले ३ हजार ४०६ उम्मेदवार भन्दा बढी माला पहिरिने आफू नै भएको र जितबाट कसैले रोक्न नसक्ने बताउनु भएको थियो । तर, उहाँ पराजित हुनु भएको छ ।

चुनावमा हारजित हुनु स्वभाविक प्रक्रिया हो । कसका कारणले भन्दा पनि जनतालाई आश्वासनका भारी बोकाएका उम्मेदवार पराजित भएको अबस्था छ । देशले परिवर्तन मात्रै खोजेको छैन, नेताहरुलाई सच्चिने अबसर पनि दिएको छ । त्यसैले नयाँ हुन या पुराना दलहरु आफूआफैंमा झगडा गरेर बस्नु र एक अर्कालाई दोषारोपण गर्नुको सट्टा जनताको आकंक्षा पुरा गर्न लाग्नु अहिलेको आबश्यकता हो ।