काठमाडौं । नेकपा एमालेका नेता केशव बडालले पार्टीभित्र मौलाउँदै गएको अनुशासनहीन अभिव्यक्ति र सरकारको स्वेच्छाचारी कदमप्रति कडा आपत्ति जनाउँदै गम्भीर असन्तुष्टि व्यक्त गर्नुभएको छ। नेपाली रेडियो नेटवर्कको चर्चित कार्यक्रम ’नेपाली बहस’मा पत्रकार खेम बमसँग संवाद गर्दै उहाँले पछिल्लो समय पार्टीका जिम्मेवार नेताहरूले संसद र सार्वजनिक मञ्चहरूमा दिने गरेका गैरजिम्मेवार अभिव्यक्तिले पार्टीको साख गिराएको टिप्पणी गर्नुभयो। विशेषगरी संसदमा रामबहादुर थापा बादलले दिएको विवादास्पद अभिव्यक्तिलाई पार्टीले गम्भीरतापूर्वक लिँदै सच्याइसकेको जानकारी दिँदै उहाँले सुरक्षा निकाय, परराष्ट्र मामिला र कर्मचारी प्रशासन जस्ता संवेदनशील क्षेत्रप्रति एमाले सधैँ मर्यादित रहेको र कसैप्रति दुर्भाव राख्ने पार्टीको नियत नरहेको प्रष्ट पार्नुभयो।

राजनीतिक निकास र सरकारको कार्यशैलीका बारेमा बोल्दै बडालले दुई तिहाइको बहुमतलाई दम्भको रूपमा नलिन सरकारलाई चेतावनी दिनुभयो। ’आफ्नो हात जगन्नाथ’ गर्ने प्रवृत्तिले लोकतन्त्रलाई कमजोर बनाउने भन्दै उहाँले विद्यार्थी संगठन खारेजी जस्ता दीर्घकालीन महत्वका निर्णयहरूमा एकलौटी नगर्न र सबै सरोकारवाला पक्षसँग गहन छलफल गर्न सुझाव दिनुभयो। वर्तमान संविधानको मर्म विपरीत काम नगर्न सरकारलाई सचेत गराउँदै उहाँले राजनीतिक प्रतिशोधको आधारमा कसैलाई दुःख दिनु गलत हुने तर्क गर्नुभयो। साथै, पार्टी अध्यक्ष केपी शर्मा ओली र कांग्रेस नेता रमेश लेखक पक्राउ परेको प्रसङ्गमा बोल्दै उहाँले नेतृत्वमा बस्नेहरूले ’मै मात्र जान्ने हुँ’ भन्ने अहङ्कार त्याग्नुपर्ने र आफ्ना कमजोरीको जिम्मेवारी आफैँले लिनुपर्ने बताउनुभयो।

साथै उहाँले एमालेले घोषणा गरेका सडक आन्दोलनका कार्यक्रमप्रति पनि समीक्षात्मक टिप्पणी गर्नुभयो। सरकार गठन भएको केही समय मात्रै भएको अवस्थामा तत्कालै सडकमा ठूला प्रदर्शन गर्दा जनतामा नकारात्मक सन्देश जाने र यसले अस्थिरता निम्त्याउने खतरा औँल्याउँदै पार्टीलाई आफ्ना विरोधका कार्यक्रमहरू तत्काल सच्याउन र जिम्मेवार प्रतिपक्षको भूमिका निर्वाह गर्न आग्रह गर्नुभयो। राजनीतिक स्थिरता र जनभावनाको कदर गर्दै संवादको माध्यमबाट समस्याको समाधान खोज्नु नै अहिलेको आवश्यकता रहेको उहाँको जिकिर छ।