काठमाडौं । विवादै विवादले घेरिएपछि अन्ततः पदभार सम्हालेको २६ दिनमै सुधन गुरूङ गृह मन्त्रालयबाट बिदा हुनुपरेको छ । विवाद थेग्न नसकेपछि गुरुङले आज पदबाट राजिनामा दिन वाध्य हुनुभएको हो । गृहमन्त्रीको राजिनामा आजै स्वीकृत भएको छ ।

चैत्र १३ गते गृहमन्त्री बन्नुभएका गुरुङले विवादास्पद शेयर कारोबारका कारण विवादमा तानिएपछि पदबाट राजीनामा दिनुपर्ने अवस्था आएको हो । गुरुङले आफूमाथि लागेका आरोपहरुमा निष्पक्ष छानविन गर्न माग समेत गर्नुभएको छ । प्रधानमन्त्री वालेन्द्र शाहका प्रभावशाली मन्त्रीका रूपमा रहनुभएका सुधन पदबाट राजीनामा दिने दोस्रो मन्त्री बन्नुभएको छ । यसअघि श्रममन्त्री दिपक शाहलाई प्रधानमन्त्री वालेनले बर्खास्त नै गर्नुभएको थियो ।

यससँगै वालेन सरकार गठन भएको एक महिना नपुग्दै दुई मन्त्री बाहिरिएको तथ्यले सरकारमाथि थप दबाब सिर्जना गरेको छ ।
पछिल्ला दिनहरूमा नागरिक स्तरबाट शेयर लगायतका विषयमा उठेका प्रश्न, टिप्पणी र जनचासोलाई आफूले गम्भीर रूपमा लिएको गुरुङले राजिनामाका क्रममा बताउनुभएको छ । राजीनामा दिँदै गुरुङले आफ्नो लागि पदभन्दा ठूलो कुरा नैतिकता भएको बताउनुभएको छ ।

आफूमाथि आरोप लागेपछि मन्त्री पद जोगाउन गुरुङ पार्टी सभापति रवि लामिछानेलाई भेट्न उहाँको निवास बूढानीलकण्ठ पटक पटक धाउनुभएको थियो । लामिछानेसंगको लगातारको भेटपछि सुधनले आज प्रधानमन्त्री बालेन शाहलाई भेट्नुभएको थियो । वालेन संगको भेट पछि केहि समयमै सुधनको राजिनामा आएको हो ।

गृहमन्त्री सुधन गुरुङको राजिनामा पछि राष्ट्रिय स्वतन्त्र पार्टी रास्वपाले प्रतिक्रिया दिएको छ । प्रश्न उठेपछि मन्त्रीले राजिनामा दिनु रास्वपाको संस्कार भएको सांसद यज्ञमणि न्यौपाने दाबी गर्नुहुन्छ ।

सामाजिक सञ्जालबाट राजिनामाको जानकारी गराउनुभएका गुरुङको प्रतिक्रिया सुन्न मन्त्रालय वाहिर २ घण्टा कुरेका संचारकर्मीमाझ भने गुरुङ केहि बोल्दै नबोलि निस्किनु भएको थियो । उहाँले मन्त्रालयमा कर्मचारीलाई धन्यवाद दिएर निस्किनु भएको थियो ।

सम्पत्ति शुद्धीकरणको कसुर भोगिरहेका व्यवसायी दीपक भट्ट समूहको लगानी भएको लघु बिमा कम्पनीको सेयरधनीमा गृहमन्त्री सुधनसमेत रहेको तथ्य खुलेपछि गृहमन्त्री विवदामा हुनुहुन्थयो । कतिपयले सुधनकोे राजिनामा ढिला आएको तर्क गरेका छन् । तर, सांसद न्यौपाने गृहमन्त्रीको राजिनामा आउनु ढिला नभएको तर्क गर्नुहुन्छ ।

संसदमा रहेका प्रतिपक्षी दलहरूले एक स्वरमा मार्गप्रशस्त अर्थात् राजीनामा दिन गृहमन्त्री गुरुङलाई सुझाव दिएका थिए भने संसदीय समिति गठन गरेर छानबिन गर्न माग पनि गरेका छन् । गृहमन्त्रीको राजिनामा पछि नेपाली कम्युनिष्ट पार्टी (नेकपा) का संयोजक पुष्पकमल दाहाल प्रचण्ड गृहमन्त्रीले पदबाट राजीनामा दिएर राम्रो गरेको टिप्पणी गर्नुहुन्छ । प्रचण्डले प्रश्न उठेपछि राजीनामा दिएर सुधन गुरुङले राम्रो गरेको टिप्पणी गर्नुभएको हो ।

एक पछि अर्को मन्त्रीको राजिनामा आउनु प्रतिपक्षीका लागि अहिले जग हँसाई जस्तो भएको छ । प्रचण्ड सरकारमा बस्नेहरूका काम कारबाहीबाटै लक्षण राम्रो नदेखिएको टिप्पणी पनि गर्नुहुन्छ । ‘ अस्ति नेपो बेबी, नेपो किड्स, करप्सन भन्नेहरू, अब त जनताले बुझ्ने दिन छिट्टै आउँछ जस्तो लाग्या छ ।प्रचण्डले सरकारप्रति आलोचना र व्यंङग गर्नुभएको छ ।

गृहमन्त्री सुधन गुरुङ विवादमा परेको यो पहिलोपटक भने होइन । उहाँको विवादको शृङ्खला नै छ । गएको भदौ २३ र २४ गतेको जेनजी प्रदर्शनदेखि चर्चाको शिखरमा पग्नुभएका उहाँ त्यतिबेलादेखि नै विवादको केन्द्रमा हुनुहुन्छ । जेनजी प्रदर्शनको मूख्य भूमिकामा नरहेका सुधनमाथि प्रदर्शन नै ‘हाइज्याक’ गरेको आरोप लाग्दै आएको छ ।

जेनजी प्रदर्शनपछि उहाँले एक सार्वजनिक कार्यक्रममै ‘संविधान फाल्ने कि नफाल्ने दोधारमा छु’ भनेर दिएको टिम्पणीले पनि उहाँको आलोचना भएको थियो । विवादका बिषय आईरहदा सुधन गुरुङले गृहमन्त्रीबाट राजिनामा दिने यो कदम स्वेच्छिक हो वा प्रधानमन्त्री र पार्टी सभापतिको दबाब । तर, जे भएपनि यो सकारात्मक कुरा भएको राजनीतिक विश्लेषक श्याम श्रेष्ठको तर्क छ ।

सरकार बनेको एक महिना नहुदै एक मन्त्री बर्खास्तमा परे भने गृहमन्त्री नै विवादित भएर राजिनामा दिनुपरेको यो घटनाले सरकार र रास्वापालाई यतिखेर तनाव आईलागेको छ । भर्खरै रास्वपालाई ताजा जनादेश दिएर पठाएका जनताले झण्डै २ तिहाईको सरकारप्रति हेर्ने दृष्टिकोण पनि अव कस्तो हुन्छ भन्न्ने प्रश्न पनि बाँकी नै छ ।

जान्नेलाई छान्ने भन्ने रास्वपाको नारा व्यवहारमा फेल खाएको लक्षण देखा परेको छ । जे होस् आफुमाथि प्रश्न तेर्सिएपछि राजिनामा दिएर छानविनका लागि मार्ग प्रशस्त गर्नुभएका सुधन गुरुङको यो कदमलाई सकारात्मक रुपमै लिनुपर्छ । विपक्षी दल पनि यो घटनामा सरकारलाई गिज्याउने र खुशी हुने भन्दा पनि आगामी दिनमा खवरदारी गर्नेतर्फ लाग्नु नै उचित हुनेछ ।