काठमाडौँ । राष्ट्रिय खेलकुद परिषद (राखेप) को सदस्य सचिव नियुक्तिका लागि युवा तथा खेलकुद मन्त्रालयले दरखास्त आह्वान गरेको छ । राखेपका सदस्य सचिव रमेश सिलवाल सहितका पदाधिकारीको नियुक्ति खारेज भएपछि राखेपको नयाँ सदस्य सचिव नियुक्तिको प्रक्रिया सुरु भएको हो ।
मन्त्रालयले आज विज्ञप्ति जारी गर्दै राखेप सदस्य सचिवका लागि दरखास्त आह्वान गरेको हो । खेलकुद विकास ऐन, २०७७ को दफा १७ को उपदफा (२) बमोजिम सदस्य सचिव नियुक्तिको लागि दरखास्त आह्वान गरिएको विज्ञप्तिमा भनिएको छ ।
मन्त्रालयले ऐनमा उल्लेख भए अनुसारको योग्यता पुगेका उम्मेदवारले सात दिन भित्र निवेदन पेश गरिसक्नु पर्ने जनाएको छ ।
असार ११ गते राष्ट्रपतिबाट प्रमाणिकरण भइ असार १७ नयाँ खेलकुद विकास ऐन २०७७ कार्यान्वयनमा आएसंगै राखेपका सदस्य सचिव रमेश सिलवाल सहितका पदाधिकारीको नियुक्ति खारेज भएको थियो ।
अन्य पदाधिकारी नियक्तिको प्रक्रिया बिस्तारै सुरु गर्ने योजनामा रहेको मन्त्रालयले कार्यकारी पदका रुपमा रहेको सदस्य सचिव नियुक्ति प्रक्रिया भने सुरु गरिसकेको छ ।
असार १८ गतेदेखि सदस्य सचिव विहीन रहेको राखेपमा अहिले भक्तबहादुर ढकाल कार्यवाहक सदस्य सचिवका रुपमा रहेका छन् ।