काठमाडौं । युरोपेली युनियन (ईयू) ले औषधी कम्पनी एस्ट्राजेनिकालाई बेलायतमा रहेको उत्पादन केन्द्रबाट आफूहरूलाई कोभिड–१९ खोपको थप मात्रा उपलब्ध गराउन माग गरेको छ ।

एस्ट्राजेनिकाले यो वर्षको पहिलो चौमासिकमा यसअघि आफूले प्रतिवद्धता गरेको मात्राको केही अंश मात्र आपूर्ति गर्न सक्ने भन्ने निर्णयले ईयूसँगको सम्बन्ध चिसिएको हो । कम्पनीले युरोपमा रहेका आफ्ना प्लान्टमा समस्या आउनुलाई कारण बताएको छ ।

तर ईयूले त्यस्तो अभावलाई अन्यत्रको उत्पादनले नै भए पनि पूर्ति गर्नुपर्ने जनाएको छ । खोप दिने काममा भइरहेको ढिलासुस्तीका लागि ईयूभित्रै उक्त क्षेत्रिय सङ्गठनको समेत आलोचना भइरहेको छ ।

ईयू र एस्ट्राजेनिकाबीचको सम्झौता गोप्य राखिनुपर्ने बिषय भनिएपनि ईयूले एस्ट्राजेनिकाले त्यो सार्वजनिक गर्न सक्ने जनाएको छ । सन् २०२१ को जनवरी देखि मार्च महिनासम्म ईयूले यसअघि सम्झौता गरेभन्दा ६० प्रतिशत कम डोज खोप पाउने बताइएको थियो ।

एस्ट्राजेनिकाको खोपलाई अझै ईयूले मान्यता दिइसकेको छैन । तर शुक्रवार इयूको औषधी नियामकले त्यसको लागि बाटो खोलिदिने अपेक्षा गरिएको छ । समस्या समाधानका लागि दुई पक्षबीच बुधवार साँझ वार्ता भएपछि ईयूले आफ्नो पुरानै अडान दोहोर्‍याएको छ । एजेन्सी