काठमाडौं । सत्तारुढ नेपाल कम्युनिस्ट पार्टी (नेकपा)का अध्यक्ष पुष्पकमल दाहाल प्रचण्ड र वरिष्ठ नेता माधवकुमार नेपालले अर्का अध्यक्ष केपी शर्मा ओलीलाई प्रधानमन्त्रीबाट राजीनामा दिन आग्रह गरेका छन् । भोलि साउन २ गतेका लागि तय भएको स्थायी कमिटी बैठकको पूर्वसन्ध्यामा सहमति खोज्न भन्दै तीन नेता आज प्रधानमन्त्री निवास बालुवाटारमा छलफलमा जुटेका थिए ।

यसअघिका वार्तामा अध्यक्षद्धय ओली र प्रचण्डबीच मात्र छलफल हुँदै आएको थियो । तर आजको बैठमा भने नेता नेपाल पनि सहभागी हुनुहुन्थ्यो । बैठकमा महासचिव विष्णु पौडेलको सहभागीता थियो । बालुवाटारमा भएको भेटमा प्रचण्ड र नेपालले ओलीलाई प्रधानमन्त्रीबाट राजीनामा दिन आग्रह गरेका छन् ।

यसैबीच, बालुवाटार जानुअघि अध्यक्ष प्रचण्डको निवास खुमलाटारमा नेकपा सचिवालय समितिका ६ नेताहरु प्रचण्डसहित माधव नेपाल, झलनाथ खनाल, बामदेव गौतम, नारायणकाजी श्रेष्ठ र रामबहादुर थापा बादलबीच छलफल भएको थियो ।

उक्त छलफलमा प्रधानमन्त्रीको राजीनामा माग्ने अडान कायम राख्ने सहमति भएको थियो । सोहीअनुसार बालुवटार छलफलमा ओलीलाई प्रधानमन्त्रीबाट राजीनामा दिन आग्रह गरिएको बताइएको छ ।

तर ओली अध्यक्ष र प्रधानमन्त्री दुबै पद नछाड्ने अडानमा हुनुहुन्छ । प्रचण्ड र माधव नेपाल पक्षका नेताहरुले स्थायी कमिटीमै ओलीले प्रधानमन्त्री र अध्यक्ष दुवै पद छाड्नुपर्ने माग राखेका थिए ।

बहुमतबाट निर्णय गर्दा पार्टी विभाजनसम्म हुनसक्ने भन्दै नेताहरुले बैठक स्थगित गरेर अध्यक्षद्वयलाई छलफलबाट सहमति खोज्ने जिम्मा दिएका छन् । तर अहिलेसम्म सहमति विन्दु फेला पर्न सकेको छैन ।