काठमाडौं । नेकपाको स्थायी कमिटी बैठक आज बस्दै छ । सात दिनलाई स्थगित गरिएको बैठक आज बस्न लागेको हो । पार्टीमा देखिएको विवाद समाधान हुन नसक्दा यसअघिका बैठक लगातार स्थगित हुँदै आएका छन्।

गत शुक्रबारका लागि तय भएको बैठक आज बिहानसम्मका लागि स्थगित भएको थियो। बाढी पहिरोका कारण जनधनको ठूलो क्षति भएको र सम्पूर्ण पार्टीपंक्तिलाई उद्धार एवं राहतमा लाग्न र आसन्न सम्भावित क्षतिलाई सकेसम्म रोक्ने कार्यमा लाग्न पार्टीको तर्फबाट निर्देशन दिँदै स्थायी कमिटीको बैठक ७ दिन स्थगित गरेको नेकपाले जनाएको थियो।

यसबीचमा नेकपाका शीर्ष नेताहरुबीच पटक पटक छलफल भएका छन्। अध्यक्षद्वय केपी शर्मा ओली र पुष्पकमल दाहाल प्रचण्डबीच वान टु वान वार्ता भएका छन्। तर सहमति भने बनिसकेको छैन।

यस्तै प्रचण्ड र वरिष्ठ नेता माधवकुमार नेपाल समूहबीच पनि छलफल भएको छ। बिहीबार दाहाल र नेपाल समूहको भेलाले पार्टीभित्रको विवाद समाधान गर्न एक महिनाभित्र केन्द्रीय कमिटीको बैठक बोलाउनुपर्ने निष्कर्ष निकालेको छ। नेकपाको पाँचौं स्थायी कमिटी बैठक असार १० गतेबाट सुरु भएको थियो।