काठमाडौं । नेपाली भुमी लिपुलेक कालापानीबारे विवादास्पद अभिव्यक्ती दिएपछि समाजवादी पार्टीबाट निकालिएकी नेतृ सरिता गिरीको मुद्दामा आज सर्बोच्च अदालतमा सुनुवाइ हुँदैछ ।

समाजवादी पार्टीले संविधान संशोधनको पक्षमा मतदान गर्न पार्टीले जारी गरेको ह्वीप नमानेको भन्दै गिरीलाई निस्कासित गरेको हो । उनको आज हुन लागेको सुनवाइ न्यायाधीशहरू हरिकृष्ण कार्की र ईश्वरप्रसाद खतिवडाको इजलासमा हुनेछ । समाजवादी पार्टीले पार्टीको साधारण सदस्य समेत नरहने गरि र संसद् सदस्यबाट पनि हटाउने निर्णय गरेपछि गिरीले त्यसविरूद्ध २८ असारमा पार्टी, संसद् सचिवालय लगायतलाई विपक्षी बनाएर सर्वोच्च अदालतमा रिट हालेकी छन् ।

उनले आफूमाथिको कारबाही कानून विपरीतको भएको दाबी गर्दै कारबाही गर्ने निर्णय बदर गर्न माग गरेकी छन् । सरकारले लिम्पियाधुरा समेत समेटेको नयाँ नक्शा जारी गरेपछि त्यसलाई नेपालको निशान छापमा समेट्न भएको संविधान संशोधनमा गिरी मतदान नगरी संसद् भवनबाट बाहिरिएकी थिइन् ।