काठमाडौं– नेपाली कांग्रेसका युवा नेता गगन थापाले प्रधानमन्त्री शेरबहादुर देउवालाई प्रधानमन्त्रीको सरकारी निवास बालुवाटारमा पार्टीको कुनै पनि बैठक नराख्न अनुरोध गर्नुभएको छ । आफूहरुले पार्टीका कामहरु बलुवाटारबाट नगर्न प्रधानमन्त्रीसँग अनुरोध गरेको र त्यसमा उहाँ सकारात्मक रहेको नेता थापाले नेता थापाले आज सामाजिक सञ्जालमार्फत जानकारी दिनुभएको छ ।

‘‘प्रधानमन्त्री शेरबहादुर देउवालाई बालुवाटारमा पार्टीको कुनै पनि बैठक नराख्न अनुरोध गरेका छौं । उहाँले ‘पार्टी कार्यालयमा धर्ना भएको कारणले योपटक बालुवाटारमा भएको हो, तर जे भए पनि अब देखि त्यस्तो हुने छैन र गरिन्न’ भन्ने विश्वास दिलाउनुभएको छ’’, थापाले ट्विटरमा लेख्नुभएको छ’, ‘यो विश्वासलाई कायम राखिदिनु होला !’

प्रधानमन्त्री देउवाले आफू बालुवाटार सरेको भोलिपल्टै कांग्रेस पदाधिकारीको बैठक सरकारी निवासमै बोलाएपछि त्यसको आलोचना भएको थियो । त्यसलाई मध्यनजर गर्दै कांग्रेस केन्द्रीय सदस्य तथा सांसदसमेत रहेका थापाले बालुवाटारमा बैठक नराख्न आग्रह गर्नुभएको हो ।

यसअघिका प्रधानमन्त्री केपी शर्मा ओलीले पार्टीको बैठकदेखि मन्त्रिपरिषद् बैठकसमेत बालुवाटारमै राखेकोमा आलोचना हुँदै आएको थियो ।