काठमाडौं । सत्तारुढ नेकपाका अध्यक्ष पुष्पकमल दाहाल ‘प्रचण्ड’सहित बहुमत सचिवालय र स्थायी कमिटी सदस्यहरुको भेलाले स्थायी कमिटी बैठक स्थगित नगरी अल्पमत र बहुमतका आधारमा अघि बढ्ने निष्कर्ष निकालेको छ । नेकपाभित्र चर्किएको आन्तरिक विवादमा दुई अध्यक्षबीच सहमति नजुट्दा यसअघि पटक–पटक स्थगित गरिएको स्थायी कमिटी बैठक मंगलबार (भोलि) बोलाइएको छ ।

सोमबार (आज) बिहान प्रचण्ड निवास खुमलटारमा भएको भेलाले बहुमतका आधारमा स्थायी कमिटीबाटै निर्णय गरेर जाने भन्दै अब बैठक रोक्न नदिने निष्कर्ष निकालेको हो ।

भेलामा वरिष्ठ नेता माधवकुमार नेपाल, झलनाथ खनाल, प्रवक्ता नारायणकाजी श्रेष्ठ र रामबहादुर थापासहित केही स्थायी कमिटी नेताहरु सहभागी थिए । तर, उपाध्यक्ष वामदेव गौतम भने भेलामा सहभागी हुनुभएको थिएन ।

असार १० गतेदेखि सुरु भएको स्थायी कमिटी बैठक यसअघि पटक–पटक स्थगित भइसकेकाले भोलिको बैठक कुनै पनि हालतमा स्थगित नगर्ने प्रचण्ड–नेपाल समूहले निष्कर्ष निकालेको हो । पार्टीमा सहमति गर्न धेरै प्रयास गरे पनि कुनै निर्णय नभएकाले अल्पमत र बहुमतका आधारमा अघि बढ्ने योजना बनेको बताइएको छ ।

स्थायी कमिटी बैठक पटकपटक स्थगित गर्दा बाहिर नराम्रो सन्देश जाने भएकाले बैठक छोट्याउने तयारी पनि भएको छ । स्थायी कमिटी बैठक छोट्याएर केन्द्रीय कमिटी बैठक बोलाउने भनिएको छ ।

यसअघि स्थायी कमिटी बैठकमा पेश भएका एजेण्डासहित थप अरु एजेण्डा समेटेर प्रतिवेदन पेश गर्ने तयारी गरिएको छ। यसअघि पार्टीमा अध्यक्ष केपी ओली र प्रचण्डबीच सहमत हुन नसक्दा प्रतिवेदन पेश हुन सकेको थिएन। अब अध्यक्ष प्रचण्डले कार्यकारी अध्यक्षको हैसियतले प्रतिवेदनसमेत पेश गरी पार्टी कमिटीले निर्णय गर्ने बताइएको छ ।