काठमाडौं – लुम्बिनी प्रदेशका मुख्यमन्त्री शंकरप्रसाद पोखरेलले राजीनामा दिनुभएको छ । उहाँले केहीबेरअघि प्रदेश प्रमुख अमिक शेरचनसमक्ष पुगेर राजीनामा दिनुभएको हो ।

प्रदेशसभामा आफूविरुद्ध अविश्वास प्रस्तावमाथि छलफल र निर्णय गर्न बोलाइएको विशेष अधिवेशन सुरू हुनु अगावै पोखरेलले मुख्यमन्त्री पदबाट राजीनामा दिनुभएको हो ।

त्यो त प्रदेशसभामा मुख्यमन्त्री पोखरेल स्पष्ट अल्पमतमापर्नुभएको थियो । विपक्षी गठबन्धनले माओवादी केन्द्र संसदीय दलका नेता कुलप्रसाद केसीलाई भावी मुख्यमन्त्रीका रुपमा प्रस्ताव गरेको छ । उहाँ मुख्यमन्त्री हुने सम्भावना प्रायः निश्चित छ ।

एमाले र माओवादी केन्द्रबीच चुनावी गठबन्धनबाट पोखरेल दाङ क्षेत्रनम्बर २ (१) बाट प्रदेशसभा सदस्य निर्वाचित हुनुभएको थियो ।
उहाँ २०७४ साल फागुन ३ गते पहिलोपटक र गत बैशाख १९ गते दोस्रोपटक मुख्यमन्त्री नियुक्त हुनुभएको थियो ।

दोस्रोपटक अल्पमतमा पर्दापर्दै पनि असंवैधानिक ढंगले पोखरेलको नियुक्ति भएको भन्दै विपक्षी दलहरुले बहुमत सिद्ध गर्न वा राजीनामा दिन निरन्तर माग गर्दै आएका थिए । सोहीअनुरुप अविश्वासको प्रस्ताव दर्ता भएको हो ।