प्रधानन्यायाधीश चोलेन्द्र शमशेर राणाले मन्त्रिपरिषद्मा भाग खोजेको विषयलाई लिएर मुलुक तरंगित बनेको छ ।

दुई पटकको संसद विघटनलाई बदर गरिदिएपछि नागरिक तहबाट वाहवाही कमाउनुभएका प्रधानन्यायाधीश राणाले त्यसबाफत मन्त्रीपरिषद्मा भागबण्डा खोजेपछि न्यायालय जगतसँगै राजनीति तरंगित बनेको हो ।

नेपाल बार एसोसिएसनले प्रधानन्यायाधीशले मन्त्रिपरिषदमा भाग खोजेको समाचार सत्य हो भने त्यसलाई रोक्न सबै पक्षलाई आह्वान गरेको छ ।

बारका महासचिव लिलामणि पौडेलले समाचारमा आएजस्तो कार्य यदि कहीँ कतैबाट हुन लागेको छ वा भइरहेको छ भने तत्काल त्यसलाई रोकी शक्ति पृथकीकरणको सिद्धान्त, नियन्त्रण र सन्तुलनको सिद्धान्त र संवैधानिक सर्वोच्चता कायम राखी सुशासन कायम गर्न सम्बन्धित सबैमा आह्वान गर्नुभयो ।

प्रधानन्यायाधीशले कार्यपालिका र अन्य संवैधानिक निकायमा भाग खोज्ने क्रियाकलापले न्यायपालिका गम्भीर संकटमा परेको महसुस भएको पनि बारले जनाएको छ ।

यो विषयलाई सामान्य रूपमा लिई अगाडि बढ्ने प्रयास भएमा न्यायपालिका र यसको नेतृत्वमात्र होइन सरकारविरूद्ध पनि कडा विरोध र आन्दोलनका कार्यक्रमहरू गर्न बाध्य हुने महासचिव पौडेलले चेतावनी दिनुभयो ।

यता सर्वोच्च अदालतले भने प्रधानन्यायाधीश चोलेन्द्रशमशेर जबराले मन्त्रिपरिषदमा भागवण्डा खोजेको भन्दै आएका समाचार निराधार भएको बताएको छ ।

मन्त्रिपरिषद् विस्तार र गठनमा प्रधानन्यायाधीशलाई असान्दर्भिक रूपमा जोडेको भन्दै सर्वोच्चले आपत्ति पनि जनाएको छ ।

सर्वाेच्च अदालतका प्रवक्ता बाबुराम दाहालले मन्त्रिपरिषद्को गठन एवं विस्तारको विषयमा प्रधानन्यायाधीशलाई जोडेर अतिरञ्जित एवं भ्रामक समाचार प्रकाशन भएको बताउनुभयो ।

प्रधानन्यायाधीशले गरेको फैसलासमेत समाचारमा जोडेर अदालतको जनआस्था कमजोर बनाउन खोजिएको सर्वोच्चले बताएको छ ।

आज नेपाल बार एसोसिएसनका प्रतिनिधिसँगको छलफलका क्रममा पनि प्रधानन्यायाधीश राणाले आफूमाथि निराधार आरोप लगाइएको बताउनुभएको प्रवक्ता दाहालले जानकारी दिनुभयो ।

प्रधानमन्त्री शेरबहादुर देउवाले कांग्रेसका नेता तथा प्रधानन्यायाधीश चोलेन्द्र शमसेर राणाका जेठान गजेन्द्र हमाललाई पनि मन्त्री बनाउन प्रस्ताव गरेको विषय चुहिएपछि राजनीतिक भूकम्प गएको हो ।

उच्च राजनीतिक श्रोतका अनुसार गठबन्धनका नेतामाँझ प्रधानमन्त्री देउवाले न्यायालयको कोटामा दुई जना मन्त्री दिनुपर्ने प्रस्ताव राख्नुभएको छ ।

ती दुईमध्ये एक सर्वोच्चमा कनेक्सन भएका दीपक तिमिल्सिना र अर्का प्रधानमन्त्री देउवा र प्रधानन्यायाधीश राणा दुवैसँग ’कनेक्सन’ रहेका गजेन्द्र हमाल रहेको श्रोतको दाबी छ ।