काठमाडौं । अर्थमन्त्री जनार्दन शर्माले आर्थिक वर्ष २०७९/०८० को बजेट प्रस्तुत गरेसँगै मिश्रित धारणा आउन थालेको छ । बजेट पुरानै शैलीमा आएको भन्दै कतिपयले टिप्पणी गरेका छन् भने अधिकांशले बजेटले आधारभूत विषयलाई समेटेको बताएका छन् ।
आजपनि अर्थमन्त्री शर्माले आइतबार प्रस्तुत भएको बजेटमा समेटिएका मुख्य विषयहरूको ब्रिफिङ गर्नुभएको थियो । बजेट वक्तव्य लगत्तै पत्रकार सम्मेलन गर्दै अर्थमन्त्री शर्माले बजेटमा छुटेका केही विषयवस्तु छलफलका माध्यमबाट थप्न सकिने पनि बताउनुभयो ।
शर्माले आगामी आर्थिक वर्षको बजेटले परम्परागत संस्कार चिर्न पनि सफल भएको दाबी गर्नुभयो । सरकारले आन्तरिक र बाह्य ऋणमा सुधार गरेको उल्लेख गर्दै अर्थमन्त्री शर्माले बजेटले थप आर्थिक वृद्धि गर्न थप सहयोग पुग्ने बताउनुभयो ।
शर्माले आगामी आर्थिक वर्ष २०७९/८० को बजेट आन्तरिक तथा वाह्य क्षेत्रको प्रभाव, मुलुकको अर्थतन्त्रमा पारेको प्रभाव, तीव्र आयात वृद्धि, विदेशी मुद्रा सञ्चितिमा परेको प्रभाव र बजार महँगीलाई ध्यानमा राखेर बजेट ल्याइएको बताउनुभयो । बजेटले आयातमुखी अर्थतन्त्रलाई उत्पादनमुखी अर्थतन्त्रमा रूपान्तरण गर्ने प्रयास गरेको उहाँको भनाइ छ ।
बजेटले कृषि र किसानलाई सम्बोधन गरेको, निजी व्यवसायीहरूलाई सम्बोधन गरेको र समग्र मुलुकको आर्थिक रूपान्तरणकै लागि केन्द्रित भएको शर्माले बताउनुभयो । कतिपयले चुनावी बजेट भन्दै गरेको आलोचना मिथ्या रहेको शर्माको दाबी छ ।
सरकारले आइतबार अनुमानित आय व्ययसहितको कुल १७ खर्ब ९३ अर्ब ८३ करोड ७३ लाख रुपैयाँ बराबरको बजेट ल्याएको छ ।
यसैबिच अर्थविद्हरूले यो बजेटमा अर्थमन्त्री स्वयं ढुकचुक हुनु राम्रो विषय नभएको बताएका छन् । बजेट आइसकेपछि कार्यान्वयनको पाटो बलियो बनाउनुको साँटो संशोधन, परिमार्जन गर्छु भन्नु अपरिपक्वता रहेको अर्थविश्लेषक परितोष पौडेलको भनाइ छ ।
बजेटका विषयमा प्रतिपक्षी दल नेकपा एमालेले पनि आफ्नो धारणा सार्वजनिक गरेको छ । एमालेले बजेटमा नयाँपन आउन नसकेको दाबी गरेको छ । चुनावलाई लक्षित गरी बढी महत्त्वाकाङ्क्षी बजेट आएको उसको आरोप छ ।
