काठमाडौं । काठमाडौं महानगरपालिकाका नवनिर्वाचित मेयर बालेन्द्र शाह ‘बालेन’ दोस्रो पटक सिसडोलमा पुग्नुभएको छ । लामो समयदेखि काठमाडौं उपत्यकाको फोहोर व्यवस्थापनमा समस्या भइरहेपछि मेयर शाह र उपमेयर सुनिता डंगोल सिसडोल पुग्नुभएको हो ।

काठमाडौं उपत्यकाको फोहोर व्यवस्थापनलाई प्राथमिकतामा राखेका मेयर शाहले बिहीबार साँझ मात्र सहरी विकास मन्त्री रामकुमारी झाँक्रीसँग परामर्श गर्नुभएको थियो । मन्त्री झाँक्री तथा मेयर शाह र उपमेयर डङ्गोलले काठमाडौं उपत्यकाको फोहोर व्यवस्थापनको समस्या मन्त्रालय र काठमाडौं महानगरपालिकाबीच सहकार्य गरेर समाधान गर्ने विषयमा छलफल गर्नुभएको थियो ।

यसअघि निर्वाचित हुनेबित्तिकै मेयर शाह अनुगमनका लागि सिसडोल र बञ्चरेडाँडा पुग्नुभएको थियो । शाहले काठमाडौंको फोहोर समस्याको दीर्घकालीन समाधान नभई कुनै जितको उत्सव नमनाउने र खादा–माला नलगाउने घोषणा गर्नुभएको छ ।

उपत्यकाको फोहोर व्यवस्थापन हुँदै आएको सिसडोल क्षेत्रमा समय समयमा अवरोध हुँदै आएको छ । स्थानीयले आफ्ना मागहरू पूरा नहुँदासम्म फोहोर व्यवस्थापन हुन नदिने भन्दै बेला बेलामा अवरोध गर्दै आएका छन ।