काठमाडौं । नेपाली कांग्रेसका महामन्त्री गगनकुमार थापाले आफ्नै पार्टी नेतृत्वको सरकारको बचाउ गर्न सक्ने अवस्था नभएको बताउनुभएको छ ।
पार्टीको केन्द्रीय समिति बैठकमा शनिबार आफ्नो धारणा राख्दै उहाँले विगतमा केपी शर्मा ओली नेतृत्वको सरकारको तीव्र आलोचना गरेका आफूहरूलाई अहिले आफ्नै सरकारको बचाउ गर्न गाह्रो भएको बताउनुभएको छ ।
‘हिजो सरकार कसरी चलाउने हामीले भन्यौं ? आज हामीले प्रतिरक्षा गर्ने अवस्था छ ?’ उहाँले भन्नुभयो ‘हिजो ओली सरकारको तीव्र आलोचना गर्यौं । आज आफ्नो सरकारको बचाउ गर्न सक्ने अवस्थामा हामी छैनौं । हिजोको प्रश्नले आज हामीलाई लखेटिरहेको छ ।’
पार्टीले अर्थ मन्त्रालय आफ्नो भागमा नराखेर गल्ती गरेको पनि महामन्त्री थापाले बताएका एक केन्द्रीय सदस्यले जानकारी दिनुभयो ।
उहाँले आफूहरूलाई पार्टीभित्र घेराबन्दी गर्न खोजे चुप लागेर नबस्ने पनि बताउनुभयो । ‘घेराबन्दी गर्ने खेल भइराख्यो भने हामी पनि निर्वाचित महामन्त्री हौं । चुप लागेर बस्दैनौं’ उहाँले भन्नुभयो ।
केन्द्रीय सदस्यहरूले महामन्त्री भएर गुटको भेलामा सहभागी भएको भन्दै उठाएको प्रश्नको पनि जवाफ दिनुभएको छ । उहाँले पार्टीमा अपमान नगरे गुटको भेला बस्नै नपर्ने पनि बताउनुभयो।
