२०८३, श्रावण ११ गते
- यो साता चर्चामा :
काठमाडौँ । प्रधानमन्त्री शेरबहादुर देउवाले सञ्चारसम्बन्धी विभिन्न कानुनहरू चालु अधिवेशनमा नै टुंगोमा पुर्याउन सरकारले पहल गर्ने बताउनुभएको छ ।
मंगलबार (आज) नेपाल पत्रकार महासंघका पदाधिकारीहरूसँगको भेटमा प्रधानमन्त्री देउवाले मिडिया काउन्सिल विधेयकसहित विचाराधीन अवस्थामा रहेका विधेयकहरुलाई टुंगोमा पुर्याउन सरकारले पहल गर्ने बताउनुभएको हो ।
प्रतिनिधिसभाको ५ वर्षे कार्यकाल सकिनै लाग्दा समेत सञ्चारसम्बन्धी विभिन्न कानुनहरू टुंगोमा पुग्न नसकेको भन्दै महासंघका पदाधिकारीहरूले प्रधानमन्त्री देउवालाई भेटेर ध्यानाकर्षण गराएका थिए ।
महासंघका अध्यक्ष विपुल पोखरेलसहित पदाधिकारीसँगको भेटपछि प्रधानमन्त्री देउवाले महासंघले उठाएका र राखेका मागहरूलाई सकारात्मक रूपमा लिई तत्काल टुंगोमा पुर्याउनका लागि पहल गर्न सञ्चार तथा सूचना प्रविधिमन्त्री ज्ञानेन्द्रबहादुर कार्कीलाई फोनमार्फत निर्देशन दिनुभएको थियो ।
महासंघका अध्यक्ष पोखरेलले प्रधानमन्त्रीसँगको भेटमा मिडिया काउन्सिल विधेयकलगायत सञ्चारसम्बन्धी विभिन्न कानुनहरू चालू अधिवेशनमा नै टुंगोमा पुर्याउन पहल गर्न आग्रह गरिएको र सकारात्मक प्रतिक्रिया पाएको बताउनुभएको छ ।
