काठमाडौं । नेपाल भ्रमणमा रहेका चिनियाँ जन कंग्रेसका अध्यक्ष ली चान्सुले पुर्व प्रधानमन्त्रीद्वय केपी शर्मा ओली र पुष्पकमल दाहाल प्रचण्डसँग भेटवार्ता गर्नुभएको छ ।

एमाले अध्यक्षसमेत रहनुभएका ओली र माओवादी अध्यक्ष प्रचण्डलाई चान्सुले नयाँबानेश्वरस्थित संसद भवनमा छुट्टाछुट्टै भेटवार्ता गर्नुभएको हो ।

चार दिने भ्रमणका लागि सोमबार नेपाल आउनुभएका चान्सुले प्रतिनिधि सभाका सभामुख अग्निप्रसाद सापकोटालाई सोही दिन भेट्नुभएको थियो। आज बिहान राष्ट्रिय सभाका अध्यक्ष गणेश तिमिल्सिनालाई भेटेपछि पुर्व प्रधानमन्त्रीद्वयलाई भेट्नुभएको हो ।

सभामुख सापकोटाको निमन्त्रणामा नेपाल आउनुभएका चान्सुको टोलीले आज अपराह्न प्रधानमन्त्री शेरबहादुर देउवालाई भेट्ने कार्यसूची रहेको छ ।