काठमाडौं । वरिष्ठ कूटनीतिज्ञ एवं प्राध्यापक लोकराज बरालले नेपालमा राजा फर्किने कुरा असम्भव भएको बताउनुभएको छ । नेपालमा जनताले अनुमोदन गरेको संविधान आएको बेला यसमा भएका कमीकमजोरीलाई सुधार्दै जानुपर्नेमा राजा ल्याउँछौं भन्दै सडकमा उत्रिनुको अर्थ नभएको दाबी गर्नुभयो ।
विवादित व्यवसायी दुर्गा प्रसाईं र उहाँका समर्थकले मंसिर ७ गते काठमाडौँबाट गणतन्त्र र भ्रष्टाचारको विकल्पमा आन्दोलन गर्ने घोषणा गरेका छन् । यसै सन्दर्भमा बरालले मंसिर ७ को आन्दोलनले मुलुकलाई नयाँ परिवर्तनतिर लैजान नसक्ने जिकिर गर्नुभएको छ ।
नेपाली रेडियो नेटवर्कको नेपाली बहसमा पत्रकार ऋषि धमलासँग कुराकानी गर्दै बरालले भन्नुभयो, ‘२००७ सालदेखि हामी नेपाली मानसिक रूपले अस्थिर छौं । कुनै नारा जुलुस हुने बित्तिकै सरकार परिवर्तन वा व्यवस्था परिवर्तन भइहाल्छ भन्ने सोच्छौं । चर्चा गर्नु एउटा कुरा हो, परिवर्तन हुनु अर्को कुरा हो । मंसिर ७ को आन्दोलन कुनै ठूलो कुरा होइन । यस्ता विरोध जुलुसले मुलुकलाई नयाँ परिवर्तनतिर लैजान्छ जस्तो लाग्दैन।’
बरालले समाजमा अराजकता फैलाउनेलाई नियन्त्रण गर्न सरकार संवेदनशील नभएको आरोप पनि लगाउनुभयो । उहाँले भन्नुभयो, ‘तपाईँहरूले मंसिर ७ को आन्दोलनलाई लिएर टेलिभिजन, सामाजिक सञ्जालहरूमा बढी महत्त्व दिइरहनुभएको छ । टिभीमा ल्याएर सोधेको छ, सोधेको छ । महँगी, भ्रष्टाचार र अराजकता अन्त्य गर्नुपर्यो भनेर जुलुस निकाल्नु ठिक कुरा हो । आफैं अराजकता सिर्जना गर्ने ? राष्ट्रिय गान नै अर्कै गाएका छन्, सेना खडा गरेको भनेका छन् । सरकार के हेरेर बसेको छ ?
प्राध्यापक बरालले राजतन्त्र फर्काउने कुरा हौवा मात्र भएको बताउनुभयो । उहाँले भन्नुभयो, मुलुकमा भएका बेथिति गणतन्त्रको दोष होइन । त्यसलाई सञ्चालन गर्ने नेताहरूको दोष हो । नेता त परिवर्तन भइहाल्छ नि । ज्ञानेन्द्र फेरि राजा भएर आए भने सुनै सुन फल्छ र ? व्यवस्था वा सरकारको विरोधमा दुईचार जना दुर्गा प्रसाईं जहिले पनि हुन्छन् । अलिअलि सलबलाइरहन्छन् । केही मान्छेलाई भ्रममा पारेर उचाल्नु एउटा कुरा हो । तर कसैले जुलुस निकाल्ने बित्तिकै सत्ता परिवर्तन हुन्छ भन्ने कुरा हौवा हो । परिवर्तन भएर मात्र हुँदैन, टिकाउन पनि पर्छ नि ।’
प्रधानमन्त्री पुष्पकमल दाहाल प्रचण्डले केही पनि गर्न नसकेको उहाँको विश्लेषण छ । बरालले भन्नुभयो, ‘प्रचण्ड आफैं जे पनि बोल्दै हिँडेका छन् । प्रधानमन्त्री भएपछि त गरेर देखाउनुपर्यो नि । आफू गर्न नसक्ने, सरकार विरोधीलाई नियन्त्रण गर्ने रणनीति बनाउन नसक्ने । सरकारले अराजकता र मनपरी गर्न छाडिदिन मिल्छ ? त्यसैका लागि त सरकार चाहिएको हो ।’
अर्को प्रसंगमा कूटनीतिज्ञ बरालले कालापानी, लिम्पियाधुरा र लिपुलेकमा अनावश्यक होहल्ला गरेर नक्सा निकालेकाले भारतसँगको वार्ता डेडलक भएको औंल्याउनुभयो ।
