काडमाडौं । राष्ट्रिय सभा निर्वाचनका लागि सत्ता गठबन्धनमा भागबण्डा टुंगिएको छ । कुल १९ सिटमध्ये कांग्रेसले सबैभन्दा बढी १० सिट भाग पाएको छ भने माओवादी केन्द्रले ६, एकीकृत समाजवादीले २ र जसपाले १ सिटमा भाग पाएको छ । प्रधानमन्त्री निवास बालुवाटारमा आज बसेको बैठकपछि कांग्रेस नेता रमेश लेखकले गठबन्धनमा भागबन्डा टुंगिएको जानकारी दिनुभएको थियो ।
उहाँका अनुसार कांग्रेसले कोशी प्रदेशमा १, मधेसमा १, बागमतीमा २, गण्डकीमा २ र सुदूरपश्चिममा २ सिट पाउने भएको छ । यस्तै कर्णाली र लुम्बिनीमा कांग्रेसले थप १–१ सिट पाउने सहमति भएको छ । यस्तै माओवादी केन्द्रले कोशीमा १, बागमतीमा १, गण्डकीमा १, लुम्बिनीमा १, कर्णालीमा १ र सुदूरपश्चिममा १ सिट पाउने सहमति भएको छ । नेपाली कांग्रेसको कोशी प्रदेशबाट कृष्णप्रसाद सिटौला उम्मेदवार बन्ने तय भएको छ । त्यस्तै, मधेस प्रदेशमा आनन्द ढुङ्गानाको नाममा लगभग सहमति जुटिसकेको छ । बागमती प्रदेशमा भने उम्मेदवार टुङ्ग्याउन केही विवाद देखिएको छ ।
यता, माओवादी केन्द्रका नेता देवेन्द्र पौडेलले संसदीय अभ्यासमा बहुमत र अल्पमत स्वाभाविक रहेको बताउँदै एमालेसँगको सहकार्यमा केही समस्या पैदा भएको बताउनु भयो ।
यता, यस्तै एकीकृत समाजवादीले बागमती र कर्णालीमा १–१ सिट पाएको छ । हालको सहमतिलाई स्विकार्दै असन्तुष्टिहरू कायम नै रहेको नेकपा एकीकृत समाजवादीका प्रवक्ता जगन्नाथ खतिवडाको भनाइ छ ।
यता, माओवादी केन्द्रबाट कोशीमा महिला कोटामा चम्मादेवी कार्की उम्मेदवार बन्दा बागमतीमा अन्यतर्फ श्रीकृष्ण अधिकारी र गण्डकीमा महिलातर्फ मनरूपा शर्मा उम्मेदवार चयन भएका छन् । यस्तै लुम्बिनीमा अन्यबाट झक्कु सुवेदी, कर्णालीमा दलित तर्फबाट विष्णु विश्वकर्मा र सुदूरपश्चिममा महिला कोटामा रेणु चन्दको नाम टुंगो लागेको छ । त्यस्तै, जनता समाजवादी पार्टी (जसपा)ले राष्ट्रिय सभा सदस्यमा पूजा चौधरीलाई उम्मेदवार बनाउने निर्णय गरेको छ ।
यता, राष्ट्रियसभा सदस्यको चुनावमा १९ सिटका लागि हुन गइरहेको निर्वाचनमा लोकतान्त्रिक समाजवादी पार्टी, जनमत पार्टी, नागरिक उन्मुक्ति पार्टी, राष्ट्रिय जनमोर्चा लगायतले भागबण्डा पाएका छैनन् ।
यसैबीच, नेकपा एमालेले राष्ट्रियसभाका १९ वटै सिटमा पार्टीका तर्फबाट उम्मेदवारहरू सिफारिस गरिसकेको छ ।
