२०८३, श्रावण १४ गते
- यो साता चर्चामा :
काठमाडौं । नेपालको वैकल्पिक टीम नेपाल ए क्यानडा एघारसँगको तेस्रो तथा अन्तिम एक दिवसीय खेलमा पराजित भएको छ । यससँगै तीन खेलको शृंखला २–१ ले क्यानडाले जितेको छ ।
पहिलो खेलमा क्यानडाले नेपाललाई चार विकेटले हराएको थियो भने दोस्रो खेलमा नेपालले क्यानडामाथि दुई विकेटको जित हासिल गरेको थियो ।
आज जितका लागि एक सय ८२ रनको लक्ष्य क्यानडा–११ ले २८ दशमलव पाँच ओभरमा छ विकेटको क्षतिमा पूरा गर्यो । क्यानडा–११ को जितमा निकोलस किर्तोनले ७७ बल खेल्दै छ चौकाको मद्दतमा सर्वाधिक ५८ रनको योगदान गरे । त्यसैगरी नवनीत दलिवालले ३८, आरोजन जोनसनले ३६ तथा निखिल दत्तले १४ रन बनाए ।
नेपालका लागि साहब आलमले चार विकेट लिए भने शेर मल्ल र बसिर अहमदले समान एक–एक विकेट लिए ।
माथिल्लो मूलपानी क्रिकेट मैदानमा टस हारेर पहिला ब्याटिङको निम्तो पाएको नेपालले ४७ ओभरमा सबै विकेट गुमाउँदै एक सय ८१ रनको योगफल बनाएको थियो । नेपालका लागि आशुतोष घिरैयाले सर्वाधिक २८ रनको योगदान दिए ।
त्यसैगरी अर्जुन कुमालले २७ बनाउँदा बसिर अहमदले २५ तथा कप्तान सन्दीप जोराले २४ रन बनाए । सुजन थपलियाले २० तथा रासिद खान र प्रतिश जिसीले १९ रन बनाए ।
क्यानडाका लागि डिलोन हेलिगर, निकोलस कीर्तन र हर्ष थाकरले समान दुई–दुई विकेट लिए भने कप्तान सादबिन जफर र कलिम सानाले समान एक–एक विकेट लिए ।
यससँगै नेपाल एले आफ्नो पहिले एकदिवसीय सिरिजलाई बिट मारेको छ । नेपालमा पहिलो पटक वैकल्पिक खेलाडीलाई समेटेर नेपाल ए टीम बनाइएको हो ।
