काठमाडौं । निर्धन उत्थान तथा सञ्जिवनी स्वास्थ्य प्रतिष्ठान कोहलपुरले बाँकेको झन्डहवामा पाठेघर मुखको क्यान्सर तथा स्त्री रोग एवं साधारण स्वास्थ्य जाँच निशुल्क स्वास्थ्य शिविर सञ्चालन गरेको छ ।

संस्थाका संस्थापक एवं उपाध्यक्ष जनार्दनदेव पन्तको सभापतित्वमा औपचारिक कार्यक्रमको आयोजना गरी शिविर सञ्चालन भएको थियो । तराईका विभिन्न स्थानमा बसोबास गर्ने महिलाहरुको पाठेघरको समस्यालाई समयमै पत्ता लगाई निराकरण गर्ने उद्देश्यका साथ शिविर आयोजना गरिएको हो ।

शिविर सञ्चालन पूर्वको औपचारिक कार्यक्रममा बोल्दै पन्तले रोग लाग्नुभन्दा लाग्न नदिनका लागि प्रयास गर्नुपर्ने बताउनुभयो । स्वास्थ्य जाँचमा जहिले पनि चनाखो बन्नुपर्ने उहाँको धारणा थियो । स्वास्थ्यका कारण धेरै नागरिकहरु गरिबीको दुष्चक्रमा फसेको बताउँदै उहाँले समयमै स्वास्थ्यको ख्याल गर्नुपर्ने कुरामा जोड दिनुभयो । स्वास्थ्य खराबीको केही लक्षण देखिए जाँच गराईहाल्नु पर्ने उहाँको भनाइ छ ।

उहाँले भन्नुभयो, ‘स्वास्थ्य जाँच नै महत्वपूर्ण कुरा हो, केही सामान्य समस्या आउँदा पनि जाँच गराउनुपर्छ, एकै पटक ठूलो रोग लागेमा ऋणको भार थपिनेदेखि रोग निको नहुनेसम्म हुन्छ, न ज्यान रहने न सम्पत्ति । यस्तो अवस्थाबाट बच्न सबैले स्वास्थ्यको ख्याल राखौँ ।’