काठमाडौं । नेपाल कम्युनिष्ट पार्टी (नेकपा)का अध्यक्ष पुष्पकमल दाहाल ‘प्रचण्ड’ले सचिवालय सदस्यहरुसँग आज धुम्बाराहीमा छलफल गर्ने हुनुभएको छ ।

प्रचण्डले अर्का अध्यक्ष केपी शर्मा ओलीसँग भएको छलफलबारे ‘ब्रिफिङ’ गर्न आज सचिवालयका आफ्ना समूहका सदस्यहरुँंग छलफल गर्न लाग्नुभएको हो ।

प्रचण्डले उनीहरुलाई आज दिउँसोका लागि पार्टी कार्यालय धुम्बाराहीमा छलफलका लागि डाकेको जानकारी आफूलाई दिएको नेकपा नेता सुवास नेम्वाङले बताउनुभयो ।

नेम्वाङ केहीबेर अघि प्रचण्डलाई भेट्न खुमलटार पुग्नुभएको थियो । नेम्वाङले प्रचण्डलाई ‘तपाईँले हिजो (बिहीबार) अबदेखि वार्ताका लागि बालुवाटार छिर्दिनँ भन्नु भएको थियो र ? भन्दै प्रश्न गर्नुभएको थियो ।

जवाफमा प्रचण्डले आफूले त्यस्तो नभनेको बताएको नेम्वाङले जानकारी दिनुभयो ।

यस्तै, नेम्वाङले छुट्टाछुट्टै भेला र बैठक बेठिक भएको र पछिल्लो स्थायी कमिटी बैठकको निर्णय कार्यान्वयन गर्दै एकतावद्ध हुनुको विकल्प नभएको भन्दै प्रचण्डलाई मनाउने कोसिस गरेको बताउनुभयो ।

जवाफमा अध्यक्ष प्रचण्डले पार्टीलाई एक बनाउनुको विकल्प नभएको तर केही समस्या देखिएकाले त्यो समाधानका लागि समय लाग्न सक्ने बताउनुभएको थियो ।

ओली र प्रचण्डबीच बिहीबार बालुवाटारमा भएको छलफलमा भनाभन भएको बताइएको छ ।

यता नेता भीम रावलले भने पार्टीमा देखिएको विवादमा राष्ट्रपति विद्यादेवी भण्डारीले खेलिरहेको भूमिकाको आलोचना गर्नुभएको छ ।
सामाजिक सञ्जाल ट्विटरमा उहाँले नेकपाको आन्तरिक राजनीतिक समस्यामा कुनै एक पक्षलाई साथ दिँदै सक्रिय हुनु भनेको राष्ट्रपति पदको मर्यादा उलंघन र स्थापित प्रणालीको अवज्ञा ठहरिने बताउनुभयो ।

हालै राष्ट्रपति भण्डारीले गृहमन्त्रीसमेत रहेका सचिवालय सदस्य रामबहादुर थापा बादल र पार्टी उपाध्यक्ष वामदेव गौतमलाई शीतल निवास बोलाएर नेकपाको विवाद समाधानमा भूमिका खेल्न आग्रह गर्नुभएको थियो ।