काठमाडौं । सर्वोच्च अदालतले नेकपा एमाले ब्यूँताइदिएपछि धुम्बाराहीको केन्द्रीय मूख्यालयमा एमालेको बोर्ड राखिएको छ । नेपाल कम्युनिष्ट पार्टी (नेकपा)को बोर्ड हटाएर आज एमालेको बोर्ड राखिएको हो ।

धुम्बाराही पार्टी कार्यालयबाट आज देशभरको पार्टी कार्यालयहरुमा एमालेको बोर्ड राख्न निर्देशन दिइएको पार्टी सचिवालयले जनाइएको छ ।
आइतबार सर्वोच्च अदालतले नेपाल कम्युनिष्ट पार्टी (नेकपा) ऋषिराम कट्टेललाई दिदै एमाले र माओवादी केन्द्र ब्यूँताइदिएको थियो ।

अदालतको फैसलाबाट उत्साहित भएका ओली पक्षधर नेता कार्यकर्ताले सोमबारनै काभ्रे, नुवाकोटलगायत देशका विभिन्न जिल्लामा एमालेको बोर्ड राख्न थालिएको थियो ।

अधिकांश जिल्लामा एमालेको साइनबोर्ड राखिसकेका थिए । देशभरका अधिकांश नेकपा कार्यालय भवनहरु एमालेकै भएकाले साइनबोर्डमात्र फेरे पुग्ने भएको नेताहरुले बताएका छन् ।

‘केन्द्रदेखि सबै तहका कार्यालयहरू अब एमालेकै नाममा फर्किएको छ’, एमाले केन्द्रीय कार्यालय सचिव ईश्वरी रिजाले भन्नुभयो ।