काठमाडौं । नेकपा एमालेको नेपाल खनाल समूहको केन्द्रीय कमिटीको बैठक आज बस्न लागेको छ ।

प्रधानमन्त्री तथा पार्टीको संसदीय दलका नेता समेत रहनु भएका पार्टी अध्यक्ष केपी शर्मा ओलीले संसदीय दलको बैठक बोलाएकै दिन नेपाल खनाल समूहको बैठक बस्न लागेको हो।

संसदीय दलको बैठक ३ बजे तय गरिएको छ भने नेपाल खनाल समूहको केन्द्रीय कमिटीको बैठक त्योभन्दा अगाडि ११ बजे नै बस्ने भएको छ ।

बैठकमा संसदीय दलको बैठकमा सहभागी हुने की नहुने र हुने वा नहुने भएमा के कस्तो रणनीति अपनाउने भन्ने विषयमा छलफल हुने नेताहरुले जानकारी दिएका छन् ।

प्रधानमन्त्री ओलीले यसअघि बोलाएको संसदीय दलको बैठकमा भने नेपाल खनाल समूहका सांसद अनुपस्थीत भएका थिए ।

आजको बैठकमा पार्टीका अध्यक्ष केपी शर्मा ओलीले आफ्नो पक्षका केही नेताहरुलाई स्पष्टिकरण सोधेको र त्यसमा उहाँहरुले दिएको जवाफका बारेमा पनि छलफल हुने भएको छ ।

त्यसैगरी प्रदेश एक र बागमती प्रदेशमा मुख्यमन्त्री विरुद्ध राखिएको अविश्वासको प्रस्ताव फिर्ता लिएको विषयमा पनि समिक्षा हुने नेताहरुले जानकारी दिएका छन् ।