काठमाडौं - सत्तारुढ नेकपा (एमाले)ले पार्टीको स्थायी कमिटीको बैठक आकस्मिक रुपमा बोलाएको छ ।

प्रधानमन्त्रीसमेत रहेका अध्यक्ष केपी शर्मा ओलीको निर्देशनमा महासचिव ईश्वर पोखरेलले आज दिउँसो स्थायी कमिटीको आकस्मिक बैठक बोलाउनुभएको हो ।

पार्टी अध्यक्ष ओलीसँगको छलफलपछि महासचिव पोखरेलले दिउँसो बालुवाटारमा दिउँसो २ बजेका लागि बैठक बोलाएको स्रोतले जनाएको छ ।

‘बालुवाटारमा बस्न लागेको सो बैठकमा राष्ट्रियसभाको उपनिर्वाचनमा आफ्ना उम्मेदवार रामबहादुर थापालाई असहयोग गर्ने माधव नेपाल समूहको व्यवहारबारे छलफल हुने छ’, महासचिव पोखरेल निकट स्रोतले नेपाली नेटवर्कसँग भन्यो, ‘साथै नेपाल समूहसँग वार्ता गर्न गठित पाँच सदस्यीय वार्ता टोलीले हालसम्म भएका छलफल र उपलब्धिबारे समेत बैठकमा जानकारी दिने छ ।’

त्यसैगरी, बैठकमा कोरोना भाइरस संक्रमणको अवस्था, नियन्त्रणको प्रयास र आवश्यक चालिनुपर्ने कदमबारे पनि छलफल हुने बताइएको छ ।