काठमाडौँ । नेकपा माओवादी केन्द्रका नेता वर्षमान पुन अनन्तलाई उपचारका लागि थाइल्याण्डको बैंकक लगिने भएको छ ।
उहालाई बुधबार बिहान बैंकक लगिने पारिवारिक स्रोतले जनाएको छ । उहाँ बुधबार बिहान आठ बजे बैंकक प्रस्थान गर्नुहुने छ ।
नेता पुन लामो समयदेखि जण्डिस बिग्रिएपछि देखिने समस्याबाट पीडित हुनुहुन्छ ।
चार वर्ष पहिले पनि उहालाई बैंककको समितिभेज अस्पतालमा उपचार गरी ल्याइएको थियो । त्यसअघि नयाँदिल्लीमा र थापाथलीस्थित नर्भिक अस्पतालमा उहाले उपचार गराउनुभएको थियो । फेरि पनि स्वास्थ्यमा समस्या देखिएपछि आइतबार सुमेरु अस्पतालमा उहाको स्वास्थ्य परीक्षण गरिएको थियो ।
परीक्षणको क्रममा रगतमा बेलिरुबिनको मात्रा बढेको पाइएको पारिवारिक स्रोतले बतायो । सोमबार माओवादी केन्द्रका अध्यक्ष प्रचण्डले पुनलाई निवासमै गएर भेट्नुभएको थियो ।