काठमाडौँ । नेकपा एमालेका नेता लालबाबु पण्डितले केन्द्रीय सदस्य पद अस्वीकार गर्नुभएको छ । पदाधिकारीमा दाबी गर्दै आएका पण्डितलाई केन्द्रीय कमिटी सदस्यहरुको सूचीमा राखिएको थियो । त्यसप्रति असन्तुष्टि जनाउँदै पण्डितले सम्पूर्ण कार्यकारी पदबाट विदा लिएको घोषणा गर्नुभएको छ ।

सोमबार (आज) सामाजिक सन्जालमा पूर्वमन्त्री पण्डितले लेख्नुभएको छ, ‘आजदेखि सम्पूर्ण कार्यकारी पदबाट बिदा लिँदै दशौं महाधिवेशनबाट सम्पूर्ण विजयी कमरेडहरुलाई सफल कार्यकालको हार्दिक शुभकामना ।’

एमाले नेता पण्डितले यसअघि आफू पदाधिकारीमा चुनाव लड्ने बताउनुभएको थियो । खास गरी उहाले पार्टीको सचिव पदमा मागदाबी गर्नुभएको थियो । तर, केपी ओलीले घोषणा गरेको १९ सदस्यीय पदाधिकारीको सूचीमा पण्डितको नाम नपरेपछि उहाले केन्द्रीय सदस्यसमेत त्यागेर संगठित सदस्यमात्रै रहने घोषणा गर्नुभएको हो ।

उहाँ महाधिवेशन नसकिँदै चितवनबाट काठमाडौं फर्किसक्नुभएको छ।