२०८३, श्रावण ११ गते
- यो साता चर्चामा :
काठमाडौं– नेकपा एमालेमा फेरि वाम एकता हुनुपर्ने बहस उठेको छ । तत्कालीन नेकपा एकता भंग भएको र एमाले पनि सिंगो रहन नसकेको स्थितिमा चुनाव नजिकिएसँगै फेरि वाम एकताको बहस उठेको हो ।
आज बसेको एमाले पोलिटब्युरो बैठकमा वाम एकताका लागि एमाले नेतृत्वले पहल लिनुपर्ने सुझाव नेताहरुले दिएका हुन् ।
बैठकमा नेता घनश्याम भुसाल र रघुजी पन्तले अध्यक्ष केपी शर्मा ओलीलाई वामपन्थी एकताको पहल लिन आग्रह गर्नुभएको हो । बैठकमा सहभागी नेता ठाकुर गैरेले वाम एकताबारे नेताहरुले सुझाव दिनुभएको जानकारी दिनुभयो ।
तर वाम एकताका लागि पहल लिनुपर्ने भुसाल र पन्तकोे प्रस्तावमा अध्यक्ष ओली पक्षधर नेताहरुले भने फरक मत राखेका थिए ।
पोलिटब्युरो सदस्य महेश बस्नेतले कार्यकर्ताहरुलाई एमालेमा भित्र्याउने नीति लिनुपर्ने तर फेरि वाम एकताको कुरा गरेर भ्रम सिर्जना गर्न नहुने बताउनुभएको थियो ।
स्थायी कमिटी सदस्य हिक्मत कार्कीले पनि वामपन्थी एकताको कुरा कर्णप्रीय भए पनि विगतका गल्ती समीक्षा नगरी प्रचण्ड–माधव समूहसँग एकताको कुराको अर्थ नहुने बताउनुभएको थियो ।
नेताहरुको सुझावपछि अध्यक्ष ओलीले अहिले वाम एकता सम्भव नरहेको तर चुनावी तालमेल गर्न सकिने जवाफ दिनुभएको छ । बैठकमा वाम एकताको कुरा सुझावका रुपमा आए पनि अध्यक्ष ओलीले चुनावी तालमेल अथवा मोर्चामा मात्रै जान सकिने जवाफ दिनुभएको पोलिटब्युरो सदस्य नारदमुनी रानाले जानकारी दिनुभयो ।
अघिल्लो चुनावमा नेकपा एमाले र माओवादी केन्द्र चुनावी गठबन्धन गरेर निर्वाचनमा होमिँदा झण्डै दुई तिहाई मत पाएका थिए । त्यसपछि पार्टी एकता भएको थियो । तर, पार्टी एकता कायम राख्न नसक्दा माओवादी र एमाले अलग अलग मात्रै भएनन् एमाले पनि फुटेर माधवकुमार नेपालको नेतृत्वमा नेकपा एकीकृत समाजवादी पनि जन्मेको छ ।
अब चुनाव नजिकिएसँगै माओवादी अध्यक्ष प्रचण्ड र एमाले अध्यक्ष ओलीले फेरि चुनावी तालमल गर्न सकिने अभिव्यक्ति दिन थालेका हुन् ।
