काठमाडौं । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले काठमाडौं महानगरपालिका र चितवन महानगरपालिकाले मेयरको उम्मेदवारमा महिलालाई स्थान दिएको प्रति खुसी व्यक्त गर्नुभएको छ ।

अध्यक्ष प्रचण्डले क्रान्तीले परिवर्तनको सुरुवात गरेको भन्दै महिला हितका निम्ति भएपनि गठबन्धनका उम्मेदवारलाई मतदान गर्न आग्रह गर्नुभयो । मुलुकको राजनीतिक परिवर्तनमा महिलाको उच्च भूमिका रहेको स्मरण गर्दै दाहालले प्रतिगमन र गतिरोधको अन्त्यका लागि गठबन्धन मजबुद बन्नुपर्ने तर्क गर्नुभयो । केही मानिसहरुले महिला उम्मेदवारका बारेमा कसैको छोरी र श्रीमती भनेर कुप्रचार गरिरहेको भन्दै प्रचण्डले आपत्ति जनाउनुभएको छ ।

‘कसैलाई छोरी र कसैलाई श्रीमतीको रुपमा कुप्रचार गरेर नकारात्मक प्रवृति देखिइरहेको छ’, प्रचण्डले भन्नुभयो, ‘महिलाको क्षमतालाई अवमूल्यन गर्ने एकथरी मानिसको कोशिस छ ।’

उहाँले त्यस्ता प्रवृत्तिको विरोध गर्दै जहाँ जहाँ महिलाहरु कार्यकारी भूमिकामा रहेका छन् ती ठाउँमा राम्रो काम भएको बताउनुभयो । उहाँले पुरुषहरूले देशमा धेरै राज गरेपनि सारै ठुलो लछारपाटो लगाउन नसकेको प्रचण्डको दाबी छ ।