काठमाडौँ - कैलालीको धनगढी उपमहानगरपालिकाको मेयरमा स्वतन्त्र उम्मेदवार गोपाल हमालले दोब्बरभन्दा धेरै मतले अग्रता बनाएका छन् । कांग्रेस, माओवादी केन्द्र, नेकपा एकीकृत समाजवादी र जनता समाजवादी पार्टी (जसपा)को गठबन्धनबाट निवर्तमान मेयर वड उम्मेदवार छन् । तर, स्वतन्त्र उम्मेदवार हमाल गठबन्धनका उम्मेदवार वडले प्राप्त गरेकोभन्दा दोब्बर मतले अगाडि छन् ।

हमालले ७ हजार ८१६ मत प्राप्त गर्दा कांग्रेसका निवर्तमान मेयर वडले ३ हजार ८७२ मत पाएका छन् । हमाल र वडबीचको मतान्तर ३ हजार ९ सय ४४ छ । अहिलेसम्म करिब २० हजार मतगणना हुँदा हमालले प्रतिस्पर्धीको मतभन्दा धेरै मतको अग्रता बनाएका हुन् ।

एमालेका रनबहादुर चन्दले १ हजार ९२१ मतमात्रै प्राप्त गरेको छन् । उपमेयरमा भने सत्ता गठबन्धनबाट नेकपा माओवादी केन्द्रकी उम्मेदवार शान्तिकुमारी अधिकारीले ३ हजार ४१६ मत पाएकी छिन् ।

एमालेकी कन्दकलाकुमारी रानाले ३ हजार ३०७ मत र स्वतन्त्र उम्मेदवार प्रभाकर भण्डारीले १९०० मत पाएका छन् ।