कैलाली । धनगढी उपमहानगरपालिकाको मेयर पदमा विजयी भएका स्वतन्त्र उम्मेदवार गोपाल हमाललाई पराजित भएका कांग्रेस नेता नृपबहादुर वडले अंकमाल गरेर बधाई दिएका छन् । आइतबार बिहान सार्वजनिक भएको अन्तिम परिणाम अनुसार हमाल २६ हजार ८६५ मतका साथ मेयरमा विजयी भएका छन् ।

१४ हजार ८१७ मत पाएर पराजित भएका नेता वडले हमाललाई अंकमाल गरेर बधाई दिँदै हार्दिकता देखाएका हुन् । अघिल्लो पटक हमाललाई नै हराउँदै मेयर बनेका वड यसपटक सत्ता गठबन्धनबाट साझा उम्मेदवार बन्दा समेत पराजित हुन पुगे । धनगढी नेपाली कांग्रेसको बलियो पकड रहेको क्षेत्र हो । यहाँका बहुमत वडामा नेपाली कांग्रेस विजयी भएको छ । तर, मेयरमा भने गठबन्धन हुँदा पनि पराजित हुनु परेपछि कांग्रेस निराश छन् ।

उपमेयरमा पनि गठबन्धनका उम्मेदवारलाई पराजित गर्दै नेकपा एमाले विजयी भएको छ । गठबन्धनबाट उम्मेदवार बनेकी माओवादी केन्द्रकी शान्ति अधिकारीलाई हराउँदै एमालेकी कन्दकला राना विजयी भएकी हुन् ।